Diyarname
Dewlet dixwaze Nexweşxaneya Dewletê ya Licê biçûktir bike, daxe asta Nexweşxaneya Entegre ya Navçeyê. Li hemberî vê yekê du hezar liceyî, tevî mebûsê DTP'ê Demirtaş derketin kolanê û meşeke li dar xistin.

Dewlet dixtorên pispor wekî kadro naşîne Lice û niha jî dixwaze ji ber vê yekê Nexweşxaneya Dewletê ya Licê ji vê astê daxwe Nexweşxaneya Entegre ya Navçeyê. Li ser vê yekê mebûsê DTP'ê yê Amedê Selahattin Demirtaş, Serokê DTP'a Amedê Necdet Atalay, Şaredarê Licê Şehmus Bayhan, Şaredarê Karazê Mehmet Kaya, Serokê Komeleya Liceyiyan Sait Şanli, endamên saziyên sivî jî di nav de 2 hezar kesî li Licê meşeke pêk anî û ev kirina hikumetê şermezar kir.
Nexweşxaneya Licê ji 50 cihên razana nexweşan pêk tê pêdivî bi 16 personelên lê dewlet personelê naşîne.
Gelê Licê di meşê de li hemberî hikumeta AKP'ê û Qeymeqamê Licê nerazîbûn nîşan da, diruşmên "AKP sebra me nefûrîne", "Erdogan îstîfa", "Qehr be AKP", "Qeymeqamê Rişwetcî" avêtin. Gel ji ber Şaredariyê heta ber nexweşxaneyê meşiya.

Li ber deriyê nexweşxaneyê mebûsê DTP'ê Demirtaş daxuyaniyeke da, da zanîn ku liceyî li hemberî her tiştê ne demokratîk û ne hiqûqî ne û wiha berdewam kir: "Ji ber ku ez bi vê pejinkariya we dizanim ez îro li vir im. Binêrin gel li vir li nexweşxaneya xwe xwedî derdikeve. Tişteke xweş e ku gel xwedî li nexweşxaneya xwe derdikeve. Lê heman pejinkarî hikumet nîşan nade."

Demirtaş  da zanîn ku dema yekem car hatiye Licê fikiriye ku biçe serdana Qeymeqam û wiha got: "Li hemberî nerazîbûnên gel û DTP'ê yên li ser vê veguhestina nexweşxaneyê Qeymeqam bi gotina, 'Divê li hemberî kesên ku vê hizûra Licê xera dikin bê sekinîn' bersiva wan daye. Li ser vê bersiva bi nivîskî ya Qeymeqam ez neçûm serdana wî. Ez Qemmeqamî dawetî îstîfayê dikim. ew qeymeqamê dewletê yan nûnerê AKP'ê ye?"

Selahattin Demirtaş diyar kir ku Lice navçeya polîs û leşkeran e, ji ber vê yeKê tu demê hizûr û ewlehî lê çênebûye û got: "A rast yê ku bêhizûriyê derdixe qeymeqam bi xwe ye."

Mebûs Demirtaş rexne li Qeymeqamê Licê Omer Kalayli kir ku ew wekî Serokê Navçeya Licê tevdigere û ev tişt anî ziman: "Ger qeymeqam pir dixwaze bilav ji qeymeqamî îstîfa bike û bibe Serokê Navçeya AKP'ê." Demirtaş berê rexneyan da Wezareta Tenduristiyê jî û got: "Bêhejmar car li Enqereyê me xwest ji bo vê yekê çare bê dîtin. Em çûn serdana Wezerî Tenduristiyê. Her got 'êmê lê binêrin' û em ewiqandin. Em ne li dij in ku li Licê nexweşxane bibe nexweşxaneya entegre, lê ger bingeha nexweşxaneyê heye, îmkan hene çima Hikumeta AKP'ê personelê naşîne."

Di Nexweşxaneyên Entegre de mecbûrî 4, lê di Nexweşxaneyên Dewletê de mecbûrî pîdivî bi 16 xebatkarên pispor heye, û li ser vê Demirtaş dibêje: "Armanca hikumetê ew e ku xebatkarên pispor neşîne Licê."

Selahattin Demirtaş di dawiyê de wisa got: "Heta ku li Licê Nexweşxaneya Dewletê ava bibe emê têkoşîna xwe bidomînin. Têkoşîna me dê li Enqereyê jî bidome. Em hêvî dikin dê Enqere dengê we bibihîze. Li Enqereyê jî emê şopînerê vî karî bin."

Serokê Komeleya Liceyiyan Sait Şanli jî rexne li berpirsan kir, da zanîn ku karsezekî xêrxwaz ev nexweşxane saz kiriye lê dewlet dixwaze vê biguherîne û got: "Her tiştê me ji me girtin, lê êdî bes e, em nahêlin dest bidin nexweşxaneya me.