Diyarname
Tûrnûvaya EURO 2008 îro bi maça fînalê bi dawî dibe. Yê bi ser bikeve dê bibe şampiyonê Ewropayê. Vane agahî:

13'emîn Şampiyonaya Fûtbolê ya Ewropayê îro bi maça fînalê bi dawî dibe. Maça fînalê di navbera Alman û Spanya ve tê lîstin. Maça fînalê dê li Viyanaya Avusturyayê li stada Ernst Happel di saet 21.45'an de bê lîstin. Li Tirkiyeyê ATV maçê bi awayekî zindî pêşkêş dike. Hakêmê maçê ji Federasyona Futbolê ya Îtalyayê Roberto Rosetti ye.

Almanya û Spanya çawa hatin fînalê?

Heta fînalê Spanyayê hemû tîm têk birin. Spanya di tûrnûvayê de tekane tîm e ku heta niha li hemberî tu tîmî têk neçuye. Spanya tevî Rusyayê ji komê derket çarîk fînalê. Di komê de bi 4-1 Rusya têk bir, Swêd û Yewnanistan jî bi 2-1 têk bir û derket çarîk fînalê. Di çarîk fînalê de bi Îtalyayê re lîst, 0-0 ma, di encama fenaltiyan de derket nîv fînalê. Û reqîba wê ya nîv fînalê de dîsa Rusya bû. Û bi 3-0 Rusya têk bir û derket fînalê.

Almanya jî heta derket fînalê  bi 2-0 Polonya, 1-0 Avusturya û Portekîz û Tirkiye jî bi 3-2 têk bir û derket fînalê. Almanya di vê tûrnûvayê de tenê carekê li hemberi Hirvatistanê bi 2-1 têk çû.

Almanyayê heta niha di sala  1972, 1980 û 1996'an de 3 caran Kûpaya Ewropayê bi dest xistiye. Spanya jî tenê carekê, di sala 1964'an de bûye Şampiyonê Ewropayê û kûpa biriye mala xwe.

Tîma bi ser bikeve dê dewlemend bibe

Li gor pisporê aboriyê Prof. Simon Chadwick ger Spanya bibe şampiyon dê 113, ger Almanya bibe şampiyon dê 112 mîlyon euro pere bike bêrîka xwe.
Maça fînalê beramberî 300 mîlyon euroyî ye, tîma ku bi ser bikeve dê pastaya mezin bixwe, ya duyem jî dîsa dê 59 mîlyon euro bigire.

Tîma şampiyon digel pereyên ku wekî xelat bigire, dê ji sponsorî, mafên ji weşana televîzyon, bilêt û malzemeyên sporê bigire, her wiha dê tesîreke li tûrîzmê jî bike.

Karê Avusturya û Swîsre

Viyana ku ji bo maça fînalê mazûvanî dike tenê ji vê maçê dê 100 mîlyon euro qezenc bike. 65 mîlyonê vî pereyî dê ji xwarin-vexwarin, firotina tiştên ticarî û lêmayîna wir bi dest bixe, her wiha ev maç dê tesîrê li tûrîzma wê derê jî bike.

Li gor lêkolînê ji ber ku Avusturya û Swisre mazûvanî ji EURO 2008 re kir, bi giştî 470 mîlyon euro pere kar kir.