Diyarname 

Di serî de li Amed, Stenbol û Wanê, li gelek bajaran kurd ji bo Roja Aştiyê li qadan bûn. Vane notên rojekê...

Li Amedê bi dehhezaran kes li qada mîtîngê kom bûn

Li ser banga KCD û BDP'ê bi deh hezaran kes di 1'ê Rezberê Roja Aştiyê ya Cîhanê de bi deh hezaran kes bi şiyara "Bi coşa Newrozê em ber bi aştiyeke bi rûmet ve dimeşin, şoreşa Rojava silav dikin" herikîn Qada Stasyonê.

Bi kincên gelêrî, bi rengên kesk, sor zer û alên PKK, KCK û wêneyên Rêberê PKK'ê Abdullah Ocalan ji Mêrdîn, Erzîngan, Çewlik, Elezîz û bajarên din ên derdorê bi hezaran kes li qada mîtîngê kom bûn.

Endamên KESK'ê Şaxên Mêrdînê ji herêma Şehîtlîkê ber bi qada mîtîngê ve bi awayekî kortejê meşiyan, lê belê wêneyên Rêberê Gelê Kurd Abdullah Ocalan li nuqteyên kontrolê ji aliyê polîsan ve hatin desteserkirin.

Endamên Keskesor jî bi alên xwe yên ji rengên keskesorê û bi dirûşma "Deng bide Rojava deng bide" cihê xwe li qada mîtîngê girtin.

Li qada mîtîngê bi pêşengiya Egîtîm-Senê bi daxwaza "perwerdeya zimanê dayikê" îmze hatin komkirin û wê ji Miduriyeta Perwerdeyê re bêne şandin.

Di mîtîngê de Hevseroka PYD'ê Asya Abdûllah, Hevseroka BDP'ê Gultan Kişanak, Hevseroka KCD'ê Aysel Tûglûk axivîn.

Li Stenbolê bû wekî mîtînga BDP'ê

Li Stenbolê meşa ji bo  1'ê Rezberê Roja Aştiyê ya Cîhanê li ber Nexweşxaneya Nimûneya Haydarpaşayê dest pê kir û heta navenda Kadikoy dom kir. Li wir mîtîng hat li darxistin. Partiyên ESP, EMEP, BDP, SDP û SYKP ku pêkhatiyên HDK'ê ne beşdarî mîtîngê bûn. Di mîtînga ku bi hezaran kes hebû de beşeke gelek mezin ji girseyê BDP'yî bûn. Hema mirov dikare bibêje bûbû wekî mîtînga BDP'ê.

Hevserokê BDP'ê Selahattin Demirtaş di mîtînga Stenbolê de axivî. Demirtaş li ser kuştina Neslihan Harman axivî û got: "Li cihekê ku jin bêne kuştin mirov nikare qala aştiyê bike. Emê li dijî nêzîktêdayîna ku jinê wekî divê bê qetilkirin, bêstûxwarkirin têkoşînê bidin. Li vir herî zêde peywir dikeve ser milên me mêran. Ji vê nêzîktêdayîna paşvemayî ya hezar salan a mêran tiştek dernakeve. Ev ne şere f, bêşerefî ye, bêheysiyetî ye."

Demirtaş got ku kurd ne mecbûr in yan bibin alîgirê Esad yan jî OSO'yê (Artêşa Azad), em rêya sêyemîn in. Demirtaş bang li yên ku deng didin AKP'ê kir û wisa got: "We bi xesasiyeta îslamî, we got dê ew biwijdan be, we wisa texmîn dikir û deng da AKP'ê. Niha divê hûn sehabê komkujiyan ji AKP'ê bixwazin. We di dema Roboskî de, we li Geziyê hesab nepirsî, divê niha hûn bipirsin. Ez di wê baweriyê de me ku yên dil dane AKP'ê ne alîgirên şer in. Ew alîgirên aştiyê ne. Lê divê ew jî dengê xwe bilind bikin. Miriyê te, yê min tune ye. Miriyên li holê yên me hem^yuan in. Ji ber vê yekê ger em digirîn em bi hev re bigirîn, em dikerin em bi hev re bikenin."

Gelê Serhedê bû lehî û herikî qada 1'ê Rezberê

Ji bo 1'ê Rezberê Roja Aştiyê ya Cîhanê, di pêşengiya BDP, HDP û saziyên sivîl ên civakî li Wanê mîtîng pêk hat. Di mîtîngê de bi deh hezaran welatiyên ku ji bajar û navçeyan hatin Wanê li gel astengiyên polîsan herikîn qada mîtîngê. 

Bi hezaran welatî li tenişta Parka Altayli ya Wanê kom bûn û ji kolana Maraş û Sixke herikîn qada Qada Beşyolê ya mîtîngê. Girseya ku li Parka Dabbaoglu kom bûn û xwestin bimeşin qada mîtîngê rastî astengiyên polîsan hatin. 

Mîtîngê bi rêzgirtin û sirûda "Ey Reqîp" dest pê kir. Serokê Komîtiya Amadekar Omer Işik, axaftina destpêkê kir. Işik, da zanîn ku her tim saziyên sivîl ên civakî li dijî şer in. Piştre parlamenterên BDP'ê, Şaredar û nûnerên saziyên sivîl ên civakî gel slav kirin.

Her wiha piştî mîtîngê li taxa Xaçortê polîsan mudaxaleyî girsê kir û di mudaxaleyê de 1 jê bi giranî 2 ciwan birîndar bûn. Birîndar rakirin nexweşxaneyê, 5 kes jî hatin binçavkirin.

Enqereyê deng da Rojava

Li Enqereyê jî ji bo Roja Aştiyê bi hezaran kes hatin ba hev, hem Roja Aştiyê pîroz kirin, hem êrîşên li dijî Rojava şermezar kirin. Di mîtîngê de bang li AKP'ê kiri ku bi awayekî cidî nêzî pêvajoya çareseriyê bibe.

Li bajarên din

Her wiha li Mêrsîn, Dîlok, Bursa, Sêrt, Dêrsim, Îzmîr, Manîsa jî bî mîtîng û meşan Roja Aştiyê hat pîrozkirin, daxwaza aştiyê hat kirin.