.jpg)
Guherîn baş e… Eger ji bo tiştin hêja be û tew bi ser de jî encamine wê yên hêjatir hebin, jixwe hingê ji başê jî baştir e…
Ez jî dixwazim li gor xwe, hema pêlekê jî be rojeva xwe û belkî hinekî be jî ya we biguherim! Bi vê kira xwe jî dixwazim bala me kurdînivîsan û ya kovaran û ya weşanxaneyan û ya bikarhênerên medyaya civakî û ya raya me ya giştî hinekî bibim ser vê mijarê!
Wekî ku tê zanîn, roja ku ji me kurdan çend kes neyên girtin jixwe tune! Her wiha eyan û beyan e ku li girtîgehan bi sedan û hezaran girtiyên kurd hene…Lê parek jê heye ku bi dehê salan e girtî ye/girtî ne! parek zêde ji girtiyên ku 15 sal in, yên ku 20 sal in û heta yên ku 25 sal in û her wiha bi cezayê hetahetê girtî ye…Erê yên ku bi cezayê hetahetê…û yek ji wan jî Welat Esen e!
Di sala 2010’an de, tevî Kawa Nemir û camêrekî ku niha nav nayê bîra min, ez di juriya Pêşbaziya Helbestê ya Huseyîn Çelebî de bûm. Min bi nav hingê Welat Esen nas kir. Ew jî tev li pêşbaziyê bûbû û di pêşbaziyê de bûbu kesê yekemîn.
Di sala 2011’ê de, hevalê min Osman ku li NÇM hem mamosteyê zimên bû û hem yê govendê bû hate girtin û 9 salan girtî ma. Û Osmên sala xwe ya dawîn li girtîgeha Bandirmayê ligel Welat Esen derbas kir. Bi vî awayî ez pê hesiyam ku gelek berhemên destnivîs ên Welat ên berhevbûyî hene. Ev çend meh in ku Osmanê hogir serî li xwe kiriye tara bêjingê û wan destnivîsan bi kedeke nebîna û bi hewleke yekta vediguheze ser kompîtorê. Siheta Osmên her xweş be…
Her wiha jî niha ji bo çapkirin û belavkirina wan berheman, amadekarî tê dikin. Helbet Azad Zal silaveke gelekî xweşik heq dike! Û belkî careke din û bi nivîseke din dor bê ser çîroka van berheman a weşandinê jî.
Vêca wekî ku min got, Welat Esen ji wan girtiyên nivîskar hew yek e!
Bi dehan girtiyên wekî wî hene ku bi dehê salan e girtî ne û di mercên gelekî dijwar de hem li ber xwe didin û hem hewl didin ku wê rewşa sext a nebîna ya girtîgehan ji bo xwe, ji bo ziman û zemanê xwe veguherin awantajake bi havil!
Îcar qe nebe bi mebesta ku Diyarname jê re bibe deng, bi mebesta ku dengê Welat bigihîne we, ez ê quncika xwe ji bo wextekê ji Welat Esen ê ku nivîskarê tibabek dosyayên kurmancî yên neweşiyayî ye re bihêlim! Ango ez ê qederê pêlekê belavkirin û danweşandina wergerên xwe yên ji fransî bo kurmancî bisekinînim!
Kurteçîroka Welat Esen:
Welat Esen di sala 1973'yan de li Dêrika Çiyayê Mazî çêbûye. Dibistana seretayî, ya navîn û lîse li Dêrikê xwendiye.
Di sala 1991'ê de li Zanîngeha Dîcleyê, li beşa Mamostetiya Dîrokê dest bi xwendinê kiriye lê di sala duyem de ji ber xebatên xwe yên polîtîk dev ji xwendinê berdaye.
Di berfanbara 1995'an de li Îzmîrê hatiye girtin. 25 salên sax in girtî ye; ango bêtirê nîvê ‘emrê xwe li girtîgehan derbas kiriye. Ji hingê ve ye ku bi cezayê muebetê girtî ye. Bi dorê li girtîgeha Bûca, Konya, Sîncan, Kirikkaleyê maye û niha jî li Girtîgeha Bandirmayê ye.
Mîna gelek girtiyên nivîskar ên kurd, Welat Esen jî bi salên dirêj e di mercên giran ên girtîgehan de xebatên xwe yên edebî didomîne û tibabek berhemên wî yên li girtîgehan bi gewde bûyî, li benda weşanê ne.
Ji helbestên wî yên ku amadekariya wan a ji bo weşanê tê kirin, du mostere:
Baranên Gumreh
Di çavên zarokekî helikî de
Virnî ne xewnên baranên nedawî
Her kêmber
Tim bêber
Loma, me baranên gumreh divê
Ser bi ser
Ber bi ber!..
26 pûşper 2011
***
Konê Şînê
Ro-nîvro
Ji nişka ve ba û baran
Li caxên şibakê
Beytikeke hezhezî
Şil û pil…
Li min hildike dil
Rabûm
Ku hildim hundir
Dest nagihayê
Ket û mir…
Konê şînê bi min da vekirin…
23 sibat 2012
.jpg)
