Merdimêke ciwan, binamûs dew de bî, jiyaney xo miyanê başî û weşî de derbas kerdêne.
Rojêke hawna dew de merdimê ke bênamûs vejiyawo û bênamûsî keno.
Vat: Ezo ê bikişî.
Şî demançey xo keyera ard, şî lacek kişt û şî teslîmê qereqole bî.
Yînan ew da mehkema. Mehkema de merdimê ma hal û rewş û bênamûsiyey yê lacekî hakimî ra vat. Hakim hawna merdimê ma baş kerdo bênamûsêke aneyîn kişto, la gorey zagonan ra mecbûr bî, ceza bido yê. Ene mesela de zehf tay ceza kamcowa, a ceza da merdimê ma û ew şirawit heps.
Dimay çende hefteyan ra dadê cê şî serdaney cê. Merdimê ma dadê xora persa:
- Dayê dew seyîna, çi est o, çi çiniyo? Dew bî pak e yan nê?
Dadî vat: Wele lacê min ez çi vacî, to jo kişt, enka di hebî bênamûsî veciyay.
Çende serî ser ra derbas bî, merdimê ma cezay xo ante, veciya, verê ke veciyo, hevalanê xo ra va:
- Wa nivîmê min tiyabê, ez yena.
Hevalanê cê çîke fam nêker, israr kerd, vat:
- Xêr o, sebî?
Ê vat: Şima vinderê heta siba, ez yena.
Merdim bi lez şî dew, wirdî bênamûsê ke veciyay bî kiştî û reyna şî teslîm bî.
Reyna hakimê ma tay ceza da ci.
Dimay çend hefteyan ra dadê cê reyna hamî serdaney cê. Reyna hal û rewş persa û nawey dadî vat:
- Wele lacê min ez çi vacî. Di bênamûsî bî, enka bî çar.
Merdimê ma wexto reyna cezay xo temam kerde, reyna şî dew, ê çar hebî jî kiştî û ageyra heps, hîvey dadê xo bî ke ka nawey go dadê cê çi xeberan biyaro.
Dima hefteyan ra wexto dadî reyna hamî verê tûtê xo, nawey vat:
- Lacê min wele nawey nê di, nê çar, hema bî heşt hebî û ez tersena dew heme bibo zey yînan.
***
Enka nîno vîrê min dewey ma de (Zenge, Licey, Amed) kamî ene fistanike vatebî û min jî goştarî kerde bî, lê wexto min zehf bênamûsê ke di facebook de vînay, zehfê cînan jî nêhercênê merdim silam bido yînan, ene fistanike hamî vîrê mi.
Helbet ma se serey 21'yinan de yê, hendî kiştiş wetêrî, merdim beşko yê merdimanê bênamûsan jî perwerde bikero baş o, la henî merdimî estê qet hêvî min çiyina ke ê bibedelî. Belê ez zana "heme çî bedelêno", la reynan jî ez vana qey henî merdimî estê qet nêbedelênê.
.jpg)
