Îro ez dixwazim camêrekî ku navê wî Şevger Çolo ye bi we bidin naskirin û têkiliya wî çawa bi provekariya li hember min re çêbû ye, bînim ziman.
Şevger Çolo wekî ku ji navê wî diyar e şev û roj digere, ajokar e û di qada navneteweyî de ajokariya lojistîkî dike. Lê taybetmendiyên Çolo bi ajokariyê naqedin. Camêrek pir reng e ku bi cil û bergên kurdewar jî her tim balê dikişîne ser xwe! Di kîjan gumrika sînorên re derbas bibe karmendên jin bi wî re wêneyên xwe dikişînin. Bo ku Çolo bi kofiya serê xwe, bi şal û şapikê xwe û bi kopalê destê xwe rengê xwe yê kurdewarî li rûyê kesan dide û bala her kesî tîne ser xwe. Gelek caran bûme şahid ku dema em bi Çolo re di nav kolanên Cizîrê de digeriyan her kesî li Çolo dinêrî û kesî li me nedinêrî.
Îca Çolo helbestvan e jî û çîroka Apê Reşît jî dinivîse. Her wiha Çolo car caran bela xwe li kesên ji rê derketî jî dide. Rengîniya Çolo ne ya îro ye jî, Çolo demekî li Almanya jî maye û pirçand e, evîndarê kurdî û şopdarê wêjeya klasîk a kurdî ye. Hevalên wî yên ajokar wî baş nas dikin û dema Çolo bi cil û bergên kurdewar li ser dîreksiyona tirimpêlê dibînin keyfa xwe jê re tînin.
Şevger Çolo ji gundekî Cizîra Botanê ye û heta niha li gelek cihan jiyaye. Lê herî zêde tolika gundan xwariye, bi sîrika koçeran mezin bûye û gelek kereng çinîne. Bo ku di rihê wî de tovê çandê hatiye çandin jiyana wî li ser çandê şîn daye û bi wê çandê li her qadê dijî.
Îca ez bêjim, ev Çoloyê me, van rojan bûye bela serê min û bûye provakator li ser serê min! Belê ka ji we re vî hêla Çoloyî porokatoriya li hemberî min bînim ziman da ku hûn Çolo baştir nas bikin û dibe ku hûn bela wî jî ji min vekin!
Mixabin ji ber şertên mecbûrî ev demeke ez li welatê Swîsreyê dijîm û li vir penaber im. Wekî gelek kesên ku li xeribiyê dijîn ez jî êşa bêrîkirina welat gelek dijîm û hestên li ser axa Cizîra Botan min sermest dikin. Îca Çolo ev çend rojin min proveke dike û bi hestên min ên bêrîkirinê dilîze. Çolo dizane ku ez gelek ji sîrik, nanê tenûrê, şişik û sîrûhêkê hez dikim. Her cara Çolo li gund van xwarinan çêdike û berî ku bixwe, wêneyên wan ji min re dişîne, li min digere û bi xwarina wan xwarinan dilê min digivêşîne. Wêneyê hevalê min digire û ji min re dişîne. Li cihên bîranîn li min digere û ji min re qala wan rojan dike! Îca ez çi ji Çolo û van provakasyonên wî bikim?! Hawar ji derdê Çolo ku bi hestên min dilîze...
.jpg)
Ji bo guhdarîkirinê:
.jpg)
