Grûba xebate ya Vateyî 1996'î ra nato ke serrêk de di rey kom bena. Yanî şeş aşman (menga) ra reyêk e. Na grûbe kombîyayîşê xoyê yewinî Serra 1996î' de viraşta û hetanî nika 25 rey kom bîya. Nê kombîyayîşan ra 15 kombîyayîşan welatanê Ewropanan de viraşta, dima ageyraya welat û êdî dest pêkerda welat de kom bîya.
A serre ra hetanî na Serra ewroyine bi hezaran çekuyan ser o munaqeşe kerda û badê nê munaqeyeşan zaf çekuyan standarte kerda.
Bê nê qerarê standartekerdişê çekuyan ra hetê gramerî ra û hetê rastnuştişî ra zî meylê xo tesbît kerda. Reyna bê nê xebatan, xebata tayê terman, tayê çekuyanê nazikvatişî û tayê çekuyanê abstrakî zî kerda rojeva kombîyayîşanê xo û munaqeşe kerda. Nameyê hûmaran, ê bajaranê Kurdîstanî û dewletanê dînya ye zî nê kombîyayîşanê xo de kerda mijara xo.
Her kombîyayîşê xo wayîrê efsaneyêk a. Her kombîyayîşê xo wayîrê hîkayeyêk a, her kombîyayîş wayîrê coşêk o, wayîrê heyecanêk o.
Nê munaqeşeyê ke kombîyayîşan de virazîyenî tayê reyî sirt benê û ge-ge zî eyarê xo ra vejîyenê. Hetanî ke wayîrê nê munaqeşeyan sey di kesê rakîbî awir danê yewbînan, yewbînan ra hêrsê xo zî anê. Zaf rey vateyî nê kesan benê tuj, çimê înan benê surî…
La gama ke mabên dîyeno kombîyayîşî yan zî kombîyayîşê a roje ke qedîyeno wayîrê nê munaqeşeyanê tujan têreyde ronişenê, çay şimenê û werd wenê. Hêrsêko kombîyayîş de virazîya yo ronişeno, boye bena hîra, awirê tirş û talî şinê û reyna her çî beno tebîî!
Her kombîyayîş tena bi munaqeşeyanê tujan ranêvêreno. Tayê kombîyayîşan de çekuyî estê eke munaqeşeyanê înan de beno tîq a, tîq a endeman û endamî pêro pîya huyenê.
Heme kombîyayîşan de hesrete esta: Hesreta welatî, hesreta xoserî û azadîye esta. Her kombîyayîşî de berpirsîyarî esta. Berpirsîyarîya kirmanckî/kirdkî/dimilkî/zazakî. Na berpirsîyarîye bena xîrete, bena disîplîne, bena eşq e. Her kombîyayîş bi nê hîsan dest pêkeno û bi hesreta ziwanî û bi berpirsîyarîyêka ciddî qedîyeno.
Çend rojî verê cû kombîyayîşo peyên ê 25'inan Çewlîg de virazîya. No kombîyayîşo peyên, hewa diyîn o ke Çewlîg de virazîyeno. Kombîyayîşo 21'yinan zî reyna Çewlîg de virazîyabi.
Çewlîg seba kirmanckî/kirdkî cayêk o taybet o. Çunke Çewlîg, Dêrsimî rey de yew bajar o ke merkezê kirmancan hesibîyen o. Grûba Xebate nê sedemî ra zaf qîymet û rumet dana Çewlîg î.
Her kombîyayîş de roja peyêne cayê kombîyayîşê ameyoxî tesbît beno. No kombîyayîş de zî wîna bi û roja peyêne de qerarê kombîyîşê ameyoxî ame dayîş. Gorebê nê qerarî kombîyayîşê 26'inan do Dêrsîm de bivirazîyo. Eke Dêrsîm musaît nêbo îhtîmalo ke Sêwregi de bivirazîyo.
Nika ra heyecanê kombîyayîşê 26'inan şewl dana zerîya endamanê na Grûbe. Û na şewle bena xem û xeyale û kewena mezgê endeman û mezgê endeman meşxul kena.
.jpg)
.jpg)
