Diyarname

Di Kûpaya Cîhanê her roj maçeke bi 120 deqîqeyî heye! Pêşî bi maça Brezîlya û Şîlî ev kevneşopî dest pê kir û dûre tîmên din dan dû.

Niha maçên Dora Duyem ên Kûpaya Cîhanê têne lîstin. 16 tîm ji bo derbasî çarîk fînalê bibin bi hev re dilîzin. Du xalên balkêş di van maçên dora diduyan de derketin pêş: Yek jê di maçên koman de gelek gol dihatin avêtin, di van maçan de gelek hindik gol têne avêtin.

Xala din jî ji 6 maçan 3 jê di 90 deqîqeyan de tu tîm bi ser neket û maç derbasî dema zêdek bûn. Di sê rojên ku her roj du maç ji bo derbasbûna çarîk fînalê hatin lîstin de her roj maçek çû dema zêdek û 120 deqîqe hate lîstin. Ev kevneşopî di roja yekem (28 pûşper 2014) , maça Brezîlya û Şîlî de dest pê kir. 90 deqîqeyên maçê bi 1-1 bi dawî bû. Di 30 deqîqeyên zêdek jî rewş neguherî û maç derbasî penaltiyan bû. Di penaltiyan de Brezîlyayê bi 3-2 Şîlî têk bir.

Di roja duyem (29 pûşper 2014) de vê carê Kosta Rîca û Yewnanistan li pêşberî hev bûn. 90 deqîqeya vê maçê jî bi 1-1 bi dawî bû û encam neguherî. Di 30 deqîqeyên zêdek de jî tîman ev wekhevî nekarî xira bike û maç derbasî penaltiyan bû. Di penaltiyan de Kosta rîka bi 5-3 Yewnanistan têk bir.

Û roja sêyem (30 pûşper), di vê rojê de jî Almanya û Cezayîr derketin pêşberî hev. 90 deqe 0-0 bi dawî bû û maç derbasî 30 deqîqeyên zêde bû. Almanyayê di 15 deqîqeyên pêşîn ên zêdek de golek, di 15 deqîqeyên din de golek din avêt. Di deqîqe 119'an de Cezayîrê bersiv da (2-1) lê têrê nekir. Bi vê encamê Almanya derbasî çarîk fînalê bû û Cezayîrê ku di dîroka xwe de yekemîn car ji koman derketibû û derbasî nava 16'ên serketî bûbû, got ji me ew qas.

Xala din a balkêş jî ew e, her roj du maç (li gor saeta Tirkiyeyê) saet 19.00 û 23.00'an de hatin lîstin, maçên ku derbasî dema zêdek bûn û 120 deqe hatin lîstin hemû jî maçên saet 23.00'an bûn. Hem sê roj dû hev her roj, hem jî her roj di maçên 23.00'an de ev rewş derket holê ku heta niha di dîroka Kûpaya Cîhanê de tiştek wisa nehatiye dîtin.

Du maçên dawîn yên dora duyem dê 1'ê tîrmehê di navbera Arjantîn û Swîsre, Belçîka û DYA de bêne lîstin.

Wekî notek: Heta niha Brezîlya, Kolombiya, Fransa, Almanya, Hollanda û Kosta Rîka derbasî çarîk fînalê bûn. Ji van tîman Brezîlya û Kolombiya (4'ê tîrmehê dê bilîzin), Fransa û Almanya (4'ê tîrmehê dê bilîzin), Hollanda û Kosta Rîka (5'ê tîrmehê dê bilîzin) di çarîk fînalê de bûn reqîbên hev. Du serketiyên maçên Arjantîn û Swîsre, Belçîka û DYA dê ji bo çarîk fînalê bibin reqîbên hev û ew jî 5'ê tîrmehê dê maça çarîk fînalê bi hev re bilîzin.