EKREM BEREKAT / DIRBÊSIYÊ / ANHA

Serokê Meclisa Rêveber a Herêma Xweser a Cizîrê Ekrem Hiso diyar kir ku wan demek berî niha peyamek ji rayedarên Encumena Niştimanî ya Kurd li Sûriyê (ENKS) re şandibûn, lê heta niha wan tu bersiv ji wan wernegirtine.

Meclisa Rêveber a Rêveberiya Xweseriya Demokratîk a Herêma Cizîrê di 21’ê nîsana borî de peyamek radestî rayedarên Encumena Niştimanî ya Kurd li Sûriyê (ENKS) kiribû. Di peyamê de banga hevdîtinekê derbarê rewşa Rojava û berpirsiyarên dîrokî derbarê doza kurdî li Rojava de kiibûn.

Serokê Meclisa Rêveber a Herêma Xweser a Cizîrê Ekrem Hiso di hevdîtinekê bi ANHA’yê re diyar kir ku heta niha wan tu bersiv ji ENKS’ê wernegirtine. Derbarê sedema bersivnedana ENKS’ê de Hiso wiha got: “Me gelek pêwendî bi rayedarên ENKS’ê re kirin û wan jî ji me re gotin ku rayedarên wan şerpeze bûne û li derveyî Rojava ne û heta niha nikarin li hev kom bibin û navaroka peyamê binirxînin.” Hiso destnîşan kir ku rayedarên ENKS’ê jêre gotine dê di hefteya bê de li hev kom bibin û navaroka peyamê binirxînin.

Hiso derbarê hevdîtina dawî ya di navbera Meclisa Gel a Rojavayê Kurdistanê (MGRK) û Encumena Niştimanî ya Kurd li Sûriyê (ENKS) de kêfxweşiya xwe anî ziman û wekî gaveke erênî nirxand û wiha da xuyakirin: “Ji bo ku em rewşa heyî bi awayekî demokratîk li Rojava û tevahî Sûriyê derbas bikin, em ê piştgiriya herdu meclisan bikin.”

Derbarê deriyê sînor ê Sêmalka de Hiso di axaftina xwe de ev tişt gotin: “Her kes dizane deriyê sînor ê Sêmalka ji aliyê Rêveberiya Xweseriya Demokratîk ve tê birêvebirin. Ji ber vê yekê di 10’ê gulanê de di civîna Meclisa Rêveber de biryar hate girtin ku komîteyek ji bo serdana deriyê sînor ê Pişxabûrê yê Herêma Başûrê Kurdistanê bike û pirsgirêka girtina derî çareser bikin û têkliyên stratejîk di navbera Hikumeta Herêma Kurdistanê û Rojava de deynin.”

Hiso di dawiya axaftina xwe de bal kişand ser siyaseta Hikumeta Başûrê Kurdistanê ya li hemberî Rêveberiya Xweseriya Demokratîk a Rojavayê Kurdistanê û diyar kir ku kolandina xendekan bandoreke neyînî di navbera her du birayan de kir û axaftina xwe wiha bi dawî kir: “Em bi hêvî ne ku birayên me li Başûrê Kurdistanê alîkariya me bikin ji bo ku em bi hev re xendekan dagirin û birînê derman bikin.”