Diyarname

Niha 8 bajar di destên BDP'ê de ne. Demirtaş qala 5 bajarên din ku dê bi dest bixin kir. Vaye bajarên Demirtaş qal dike.

Niha şaredariya 8 bajaran (Amed, Wan, Culemêrg, Şirnex, Batman, Îdir, Dêrsim, Sêrt) di destê BDP'ê de ye. BDP'ê ji bo hilbijartina 30'ê adara 2014'an hedefa xwe bilind kiriye. Hevserokê BDP'ê Selahattin Demirtaş li Gevera Culemêrgê axivî û qala bajarên ku niha ne di destên wan de ne û dê di vê hilbijartinê de wan jî bi dest bixin kir.

Vaye ew bajar û gotina Demirtaş:

"Emê şaredariyên mîna Şaredariyên Bajarên Mezin ên Riha û Mêrdînê, şaredariyên Mûş, Bêdlis, Agirî, Çewlik, hin şaredariyên li Erzîromê, şaredariya Qersê ku serketina me zelal e, xebatên xwe zêde bikin. Li Culemêrgê jî emê şaredariyên xwe yên heyî careke din qezenc bikin û Buyukçîftlîk a heta niha ne ji partiya me bû nû beşdar bû û şaredariya Rûbarokê bi dest bixin, bi vî rengî înşalelh emê li tevahiya Culemêrgê Şaredariyên BDP'yî bibînin. Di van hilbijartinan de hedefa Culemêrgê ev e. Bi tenê qezenckirina şaredariyê nîn e, tevî şaredariyên bajarokên biçûk ên ne ji me qezenckirina hemû şaredariyan e. Li Culemêrgê, bi bilindkirina dengan re qezenckirina BDP'ê êdî ji bo Culemêrgê meseleyeke hêsan e. Ji ber tevahiya xebatên li vê derê ji aliyê gel ve tên meşandin. Yanî gel bi ked û berdêlê, vî karî dimeşîne."