MÊRDÎN

Heyetek ji ÎHD û FÎDH'ê, ji bo mijara girtina deriyên sînor û ambargoya li hemberî Rojavayê Kurdistanê lêkolîn bike, li ser 'sînor' e. Heyet dê der heqê lêkolîna xwe ya sê rojan de raporekê amade û aşkera bike.

Heyeta mafên mirovan a ji Serokê Giştî yê ÎHD'ê Ozturk Turkdogan, Alîkarê Serokê Giştî yê ÎHD'ê Serdar Çelebî, Nûnerê ÎHD'ê yê Herêma Rojhilat û Başûrrojhilat Şevket Akdemîr, Endama Desteya Rêveberiya Navendî ya ÎHD'ê Sevîm Salîhoglû, Serokê Rêxistina ÎHD'ê ya Amedê Racî Bîlîcî û Alîkarê Serokê Giştî yê Federasyona Mafên Mirovan a Navneteweyî (FÎDH) Yûsûf Alataş, li Deriyê Sînor ê Nisêbînê û Deriyê Sînor ê Nû yê Nisêbînê lêkolîn kirin.

Serokê Giştî yê Komeleya Mafên Mirovan (ÎHD) Ozturk Turkdogan li dû lêkolînan li Deriyê Sînor ê Nû daxuyaniyek da û diyar kir ku heyet dê 3 rojan li ser sînor lêkolînan bike û nêrînên rêxistinên pîşeyî û rêxistinên civakî yên sivîl bigire.

Turkdogan ragihand ku ew dê piştî lêkolînên xwe yên 3 rojan roja duşemê li Dîlokê bi Waliyê ji kampên penaberan re berpirsyar re hevdîtinekê pêk bînin.