Amed

Wezareta Çandê ya Tirkiyeyê biryar girtibû ku piştgiriya madî û manewî ya nivîskariya tirkî bike. Li hemberî vê yekê Komeleya Nivîskarên Kurd û Pena Kurd li Amedê li ber Midûriyeta Çandê ya Amedê daxuyaniyeke da. 

Daxuyaniya her du saziyan ji aliyê Sekreterê Giştî yê Komeleya Nivîskarên Kurd Îlhamî Sîdar ve hate xwendin.

Di daxuyaniyê de hate gotin ku Wezareta Çandê ya Tirkiyeyê dê ji bo nivîskar û berhemên wêjeyî yên bi tirkî piştgiriyê bidin; dê wezaret ji bo vê yekê pere veqetîne, hem di serdema nivîsînê de, hem jî di dema çapkirinê de piştgirî bide. Li hemberî vê yekê nivîskarên kurd nezarîbûn nîşan da û got ku ev yek helwesteke cudakar e.

Di daxuyaniyê de hate gotin ku ew wekî nivîskar û rewşenbîrên kurd dê li hemberî vê zihniyeta ku her tiştî ji bo berjewendiyên xwe bikar tîne derkevin û di vê çarçoveyê de ew vê biryara Wezareta Çand û Tûrîzmê ya cudakar, ya ku çand û nasnameyên din dehf dide, tune dihesibîne,  nas nakin û qebûl nakin.

Di daxuyaniyê de hate gotin ku ji hemwelatiyên tirk, kurd, laz, ereb, çerkez û ji hemwelatiyên ji kokên etnîkî yên din bac tê girtin; ji vê bacê pere tenê ji bo ziman û çanda tirkî bikar tînin. Nivîskaran ev yek hestên yekîtî û bi hev re bûnê ya gelan xira dikin, hesta bi hev re jiyanê lawaz dike.

Nivîskaran xwest ev mesele ji nû ve ji bo pêşvebirina ziman, çand û wêjeya hemû hemwelatiyên tirk, kurd, laz, ereb, çerkez û yên din bê sazkirin û gotin ku ew dê di her platformê de vê daxwaza xwe ya wekheviyê bînin ziman.