Enqere
Wezîrê Karên Hundir ê Tirkiyeyê Muammer Guler bersiva pirsa mebûsa BDP'ê Ata da û got: "Em nizanin gora Şêx Seîd li ku ye."

Şêx Seîd di sala 1925'an de tevî 46 hevalên xwe hatin îdamkirin. Di 11'ê reşemiya 2013'yan de Mebûsa BDP'ê ya Batmanê Ayla Akat Ata pirsiyarnameyeke da Wezareta Karên Hundir a Tirkiyeyê û pirsa gora Şêx Seîd kir.

Wezîrê Karên Hundir ê Tirkiyeyê Muammer Guler bi bersiveke nivîskî, bersiva pirsa Ata da û got: "Li ser mijarê tu agahî û belge di destê wezareta me de nîn e."

Mebûsa BDP'ê Ata ev pirs ji wezaretê kiribûn:
"- Gora Şêx Seîd û hevalên wî li ku ye?
- Belgeyên aîdê lêpirsîna Şêx Seîd ji bo 80 salan hatibûn veşartin. Digel ku serdema fermî ya veşartina belgeyan temam bû jî çima bi awayê orjînal ew belge ji bo raya giştî nayên eşkere kirin? Tu sedemeke hiqûqî ji bo vê yekê heye?
- Ger sedemeke hiqûqî nîn be sedema eşkerenekirina van belgeyan çi ye?
- Nasnameyên Şêx Seîd û 46 hevalên wî yên din çi ne?
- Rayedarên di dema girtin û îdamkirina dema Şêx Seîd de kî bûn/
- Tiştên şexsî yên aîdê Şêx Seîdê hatiye îdamkirin hebûn?