Diyarname
Derhênerê kurd Behmen Qubadî vê carê bi fîlmekî nû hat: "Demsala Gergedanan". Fîlmê "Demsala Gergedanan" (Rhino Season) ku îro ket vîzyonê ji bo Qubadî jî girîng e lewre Qubadî yekem car fîlmekî li derveyî Îranê dikişîne.

Derhênerê kurd Behmen Qubadî ku heta niha bi fîlmên wekî "Heyama Hespên Sermest", "Stranên Welatê Dayika Min", "Kûsî jî dikarin bifirin" û "Nîvê Heyvê" derketibû pêşberî sînemahezan, Festîvala Cannesê jî têde li gelek festîvalên navneteweyî xelat girtibû, li Îranê sazkirina fîlman ji bo wî hatibû qedexekirin. Di heman demê de rewşa girtina Qubadî jî derketibû holê loma Qubadî ji Îranê derketibû û êdî venagere. Piştî vê kêliyê wî niha yekemîn fîlmê xwe kişand (di heman demê de yekemîn car li derveyî Îranê film dikişîne) û ew fîlm îro dikeve vîzyonê.

Du agahiyên din jî ev in ku Qubadî fîlm li Tirkiyeyê bi şirîkatiya BKM (Yilmaz Erdogan) kişand ku ev yek li xweşa hin sînemagerên kurd neçû, hin kurdên ku ji Erdogan aciz in jî bi çavekî neyînî li meseleyê nêrîn. Yek ji agahiyan jî, di fîlm de lîstikvana navdar a îtalî Monica Belluci dilîze. Her wiha lîstikvanê efsanevî yê Îranê Behrûz Vossûqî piştî 35 salan careke din bi hewla Qubadî derdikeve pêş ekranê. Dema mirov van agahiyan hemûyan dide berhev encama vîzyonê ku derkeve balkêştir dibe.

Mijara fîlm ji bûyereke rastîn hatiye girtin: Fîlm, çîroka helbestvanê îranî Sahel Farzan ku piştî 30 sal ji girtîgehê derdikeve pêşkêş dike. Berî 30 salan ji zarok û jina wî re hatiye gotin ku helbestvan hatiye kuştin; Ew jî, dema ji girtîgehê derdikeve tê Stenbolê ji bo lê bigere û zarok û jina xwe bibîne. Fîlm demên pêş û demên piştî berdanê yên helbestvan nîşan dide. Kesê jiyana Sahel jî, ya jina Wî jî tevlihev kiriye heman xal e "Evîn".

Çend roj berê li Tirkiyeyê fîlm ji bo endamên çapemeniyê hat nîşandayîn. Di nav rexnegirîn sînemayê yên Tirkiyeyê de dubendiyeke derket holê: Yên ku ji fîlm hezkirin, yên ku ne ecibandin jî derketin holê.

Fîlmê ku 26'ê mehê ket vîzyonê di serlîstikvaniya wî de Behrûz Vossûqî, Monica Belluci, Yilmaz Erdogan hene.

Kunye:
Rhino Season / Demsala Gergedanan
Sazkar: BKM Film
Derhêner: Behmen Qubadî
Senaryo: Behmen Qubadî
Derhênerê Dîmenê: Touraj Aslani
Vesazkirin: Valérie Loiseleux
Cure: Romantîk - Dram
Vesazkirina Deng: Thomas Robert
Mîksaja Deng: Stéphane de Rocquigny
Muzîk: Kayhan Kalhor
Format/ Dirêjahi: 35 mm, rengîn, 93 deqîqe
Ziman: Farisî, Tirkî, Îngilîzî
Sala Kişandinê: 2012
Lîstikvan: Behrûz Vossûqî, Monica Belluci, Yilmaz Erdogan, Caner Cindoruk, Beren Saat, Arash Labaf, Belçim Bilgin, Ahmet Mumtaz Taylan

**

Ji bo temaşekirina fragmanê bitikînin: DEMSALA GERGEDANAN

***

Fîlmên din ên vê hefteyê:

Her wiha vê hefteyê du fîlmên din jî di vîzyonê de ne:

Asterix et Obelix: Au Service de Sa Majeste - Asterîks û Oburîks li ser peywirek veşarî ne
Derhêner: Laurent Tirard
Lîstikvan: Gerard Depardieu, Edouard Baer, Guillaume Gallienne, Vincent Lacoste

Cloud Atlas - Atlasa Ewrê
Derhêner: Tom Tykwer, Andy Wachowski, Lana Wachowski
Lîstikvan: Tom Hanks, Halle Berry, Hugh Grant, Hugo Weaving