Diyarname
Weşanên Lîs du pirtûkên lêkolînî çap û belavkirin, yek li ser eşîrî ye ku Şerefxan Cizîrî nivîsandiye, ya din jî li ser rexneya wêjeyê ye ku Samî Hêzil nivîsandiye.
OMERIYA MÎRSOM
"Omerîya Mîrsom" navê pirtûka Şerefxan Cizîrî e. Cizîrî di vê pirtûkê hewl daye ku pergala eşîriyê ya li herêma Mêrdînê bi rêbazên zanistî bi civaka kurdan bide naskirin. Li ser Eşîra Omerîyan bi hûrgilî rawestîyaye û derheqê Eşîra Omerîyan de zanebûnên berfireh, bi baldarî pêşkêşî xwendevanan dike. Lêkolîner, ew jêderkên heyî nirxandine û kêmasîyên wan, dîtinên şaş û pêşdarazînên ku di derbarê Eşîra Omerîyan de hene raxistine ber çavan. Nivîskar li ser armanca amadekirina pirtûkek wisa ev yek gotiye, "Di derbarê civaka eşîriya Kurdistanê de zanebûnên rast derxin pêş û bibe alîkar ji bo ku kurd xwe hîn baştir nas bikin."
ŞEREFXAN CIZÎRÎ KÎ YE?
Nivîskar Şerefxan Cizîrî di sala 1955’an de li Mêrdînê hatiye dinê. Piştî temamkirnia dibistana amadeyî di sala 1975’an de çûye Swêdê û li wir lîsansa xwe di Beşa Zanistên Sîyasî û Tarîxê de kiriye. Cizîrî li Swêdê di nav partiya çep de bi salan kar kir û li Huddingê jî 15 salan wezî cîgirê şaredar, endamê meclisa şaredariyê kar kir. Ew piştî 25 salan vegera welêt û ji sala 2001’ê û vir ve bi malbata xwe re li welêt dijî. wî heta niha bi navê "Tarih ve Uygarlik (Cild 1-2)", "Bize Bir Felsefe Lazim", "Yazarlik ve İdeoloji", "İskandinav Modeli" hin pirtûkên bi tirkî weşandin. "Omeriya Mîrsom", "Esaleta Selahadînê Eyûbî", "Edebiyata Devkî û Sosyalîzasyon" pirtûka wî ya bi kurdî ne.
WERGERA EDEBÎ
Pirtûka "Wergera Edebî Di Kurdî" de ji aliyê Samî Hêzil ve hatiye amadekirin. Pirtûk lêkolîneke zanistî ya der barê wergera edebî ya kurdî de ye. Berhem cih dide mijarên wekî paşxaneya dîrokî ya wergerê, biwarê wergernasiyê, teorî û têgihên wergernasiyê, wergera edebiyatê û taybetiyên wergera cureyên edebî.
Armanca nivîskar bi vê pirtûkê ew ku der barê teorî, model û têgihên wergernasiyê û paşxaneya dîrokî ya wergerê de û der barê wergera kurdî de lêkolîneke giştî jî pêşkêş bike.
SAMÎ HÊZIL KÎ YE?
Nivîskar û werger Samî Hêzil di sala 1975’an de li Wanê hatiye dinê. Lîsansa xwe ji beşa Ziman û Wêjeya Îngilîzî wergirtiye. Wî li Zanîngeha Mardîn Artuklu di beşa Ziman û Çanda Kurdî de mastera xwe temam kiriye û niha jî di beşa Ziman û Wêjeya Kurdî ya Zanîngeha Bîngolê de teza xwe ya doktorayê li ser wergera edebî dinivîse.
Hêzil heta niha pirtûkên wekî "Kurte Wêjeya Kurdî" (2015), "Lehengê Mîtolojiyê" (2021),
"Wergera Edebî Di Kurdî De" (2025) amade û çapkirine. Ji bilî van 5 pirtûkên ku wî wergerandine kurdî jî hatine weşandin.
- Wergera Edebî Di Kurdî De / Samî Hêzil / Lîs / Wêje Rexne / 320 rûpel / 2025
- Omerîya Mîrsom / Şerefxan Cizîrî / Lîs / Lêkolîn / 360 rûpel / 2025