Diyarname
General Mezlûm Ebdî behsa lihevkirina bi Şamê re kir: “Fermandar û endamên me dê cihên rêzdar di nav artêşa Sûriyeyê de bigirin."

Fermandarê Giştî yê Hêzên Sûriyeya Demokratîk (HSD) General Mezlûm Ebdî bi ajansa The Associated Pressê (AP) re li ser rewşa dawî ya Sûriyeyê û Rojava axivî.

Ebdî diyar kir ku wan û Şamê di prensîpê de li hev kiriye ku HSD wekî grûbe tevli artêşa niştimanî ya Sûriyeyê bibe.

'EMÊ WEKÎ PÊKHATEYA MEZıN TEVLÎ BIBIN'
Ebdî destnîşan kir ku her du aliyan li ser “mekanîzma” tevlîbûnê li hev kiriye û ev got: "Em behsa hejmareke mezin a leşkeran dikin; bi dehhezaran leşker û her wiha bi hezaran hêzên ewlehiya hundirîn (Asayîş). Ev hêz, wekî komikên din, nikarin bi awayekî takekesî tevli artêşa Sûriyeyê bibin. Berovajî wê, ew ê wekî pêkahteyên leşkerî yên mezin tev lê bibin. Ev jî dê li gorî rêbazên wezareta parastinê were kirin.”

Fermandarê HSD'ê eşkere kir ku ji bo diyarkirina mekanzimeyeke tevlîbûnê ya guncav, wan komîte damezirzandine û ew komîte dê bi wezareta parastinê û rayedarên din ên leşkerî re bixebitin.

'CIHÊN RÊZDAR DÊ BIGIRIN'
Generalî got ku bawer dike, endam û fermandarên HSD'ê dê postên baş di wezareta parastinê û fermandariya artêşê de bi dest bixin û ev gotin: “Li gorî tecrube û dirêjahiya xizmeta wan, ew ê cihên rêzdar di nav artêşa Sûriyeyê de bigirin. Ev tecrubeya wan dê alîkariyê bike ku artêş xurttir bibe.”

Fermandar Ebdî got ku hêzên hundirîn (Asayîş) jî dê entegreyî hêzên ewlehiyê yên Sûriyeyê bibin. Ebdî got ku ev lihevkirin di wê civînê de pêk hat ya ku di destpêka vê mehê de bi Colanî û wezîrên wî re pêk hatibû. 

General Ebdî kuştin û bûyerên mezhebî yên bi destê çekdarên Şamê li herêmên berav û Siwêdayê yên Sûriyeyê qewimîbûn, bi bîr anîn û got, ew bûyer bûn sedem ku gelek kesên li bakurê rojhilata Sûriyeyê, li hemberî tevlîbûna nava artêşa Sûriyeyê didul bibin: “Ev yek ji wan sedeman bû ku cîbicîkirina peymana 10'ê Adarê dereng xist. Eger pêşkevtin di cîbicîkirina peymana 10'ê Adarê de çêbibe û hemû madeyên wê werin sepandin, Em wisa bawer dikin, em ê bikarin rê li ber wê bigirin ku careke din bûyerên wisa biqewimin.”

'DIVÊ HEMÛ SÛRÎ XWEDAN MAFÊN WEKHEV BIN'
Ebdî teqez kir ku ji bo rê li ber êrîşên wisa taifî/mezhebî bê girtin, divê lihevkirineke wisa çêbibe ku hemû sûrî xwedan mafên wekhev bibin û hemû beşdarî avakirina dewletê bibin.
Generalî got ku ew nenavendîtiyê dixwazin ku desthilat di navbera navend û parêzgehan de were dabeşkirin. 

Fermadarê HSD'ê got, sepandina peymana 10'ê Adarê tê wê wateyê ku hemû saziyên sivîl, aborî û leşkerî yên bakurê rojhilata Sûriyeyê entegreyî birêveberiya Şamê bibin.

Ebdî Li ser hewlesta Tirkiyeyê jî axivî û got, “Ez bawer dikim, eger sûrî li hev bikin, wekî ku niha çêdibe. Ew ê tu hincetê Tirkiyeyê tune bin ku destwerdanê bike. Em dibînin ku hinek nermahî di helwesta Tirkiyeyê de li hemberî tevlîbûna HSD'ê bo artêşê çêbûye.”