___Cemil Oguz___

15'ê Gulanê Cejna Zimanê Kurdî ye. Ji ber roj kovara Hawarê roja 15'ê gulana 1932'yan de hatiye derxistin kurdan ev roj wekî Cejna Zimanê Kurdî diyar û qebûl kiriye. Her sal vê rojê bi çalakiyan ev cejn tê pîrozkirin. Di vê çarçoveyê de îsal jî sazî û komeleyên kurdan xebat dane dest pê kirin. Îsal ji 4'ê gulanê heta 1'ê pûşperê bi sedan çalakî li sedan bajar û navçeyan wê li dar bikevin.

Nêzî 50'ê saziyan ku di nav de komeleyên li ser zimanê kurdî xebatê dikin, saziyên sivîl û DBP û DEM Partî jî hene. Wan eşkere kir ku di mehekê de li sedan cihan wê gelek çalakî lidar bikevin. Îsal xebat bi diruşma "Statuya Kurdî, Perwerdehiya Bi Kurdî" li dar dikeve.
Li ser vê me bi Hevberdevkê Komîsyona Ziman, Çand û Hunerê yê DEM Partî Heval Dilbihar re xeber da.

HEMÛ BAJARÊN KURDAN Û HIN BAJARÊN TIRKIYEYÊ
Dilbihar piştî balê dikişîne ser deklerasyona ku wan roja 4'ê gulanê belav kiriye, dibêje, "Heta 1'ê hezîranê li hemû bajar û navçeyên kurdan, ligel van li gelek bajarên Tirkiyeyê yên ku kurd lê dijîn çalakiyên cuda dê bêne lidar xistin."

BERNAMEYÊN HEVPAR Û BERNAMEYÊN XWESER
Dilbihar bibîr dixe ku salên borî tenê saziyên ziman ev kar kirine û wiha didomîne, "Îsal saziyên cuda, saziyên di hemû qadan de kar dikin, saziyên hiqûqî, saziyên jin, bawerî, tenduristî, partiyê siyasî di nav vê xebatê de ne. Hem dê bernameyên hevpar hebin, hem jî her sazî li gor qada xwe dê bernameyên xweser li dar bixin. Mînak jin li ser jinan, saziyên olî li ser vê, yên hiqûqê li ser hiqûqê dê bi kurdî bernameyên xweser çêbikin. Di vê çarçoveyê de kar û xebatên li gundan, li kolanan, yanê li derve jî wê bêne kirin, Maşên ziman ên gişteyî wê bêne kirin. Sempozyum, konfernas, panel wê li dar bikevin. Dîsa konên zimanên kurdî bêne vekirin li çend bajaran û wê bername li dar bikevin."

700 HEZAR BELAVOK
Hevberdevkê Komîsyona Ziman, Çand û Hunerê yê DEM Partî Dilbihar bibîr dixe ku li van deran bi awayê sembolîk wê dersên alfabeyê bêne dayîn, konser û şahî li dar bikevin û vê lê zêde dike, "Li van gund, navçe û bajaran wê belavok bêne belavkirin. Me 700 hezar belav çap kirine, me dest bi belavkirina wan kiriye. Ji bo zarokan, ciwanan taybet bernameyên me hene."

KURDÎ LI BILBOARDAN Û OTOBUSAN
Dilbihar diyar dike ku li bajarên şaredarî di destê kurdan de ye wê li bilboardan, li otobusan afîşên bi kurdî bêne daliqandin û got ku wê DEM Partî jî di vê çarçoveyê de ji UNESCO'yê re nameyeke li ser kurdî bişîne.

ÇALAKIYÊN BI KIRMANCKÎ
Dilbihar di dawî de dibêje, "Ji bilî van li Amedê wê Konferansa PEN'a Kurd, dîsa li Wanê Sempozyûma Zimanê Kurdî li dar bikeve. Ji bilî van hin meşên me jî hene. Yek jê ji Wanê heta Bazîdê ber gora Ehmedê Xani wê çêbe. Yek jî ji Silopî heta Cizîrê ber Medreseya Sor wê li dar bikeve. Îsal xebateke taybet jî ji bo kirmanckî ye. Li bajarên ku kirmanckî lê serdest e li wan bajaran wê xebatên bi kirmanckî bêne kirin."

Vîdeoyek:
 

***

Nûçeya Eleqedar:

- Bi daxwaza 'Bila kurdî bibe zimanê fermî' dadikevin kolanan