Enqere
Hevserokê BDP'ê Selahattin Demirtaş di civîna Serokên Bajaran ên BDP'ê de axivî. Demirtaş got ku AKP ne tenê kurdên li Tirkiyeyê, dike ku pêşî li kurdên li Îran, Iraq, Sûriye, Ewropa û DYA'yê bigire û wiha got: "Gelê kurd li ku derê dema daxwaza statuya xwe dike AKP li wê derê dikeve nav xebata pêşîlêgirtinê. Ev ji dijminiya li hemberî kurdan jî wêdetir, rewşa hebûn û nebûna xwe ye Ji ber ku ji bo AKP'ê hebûna projeya yek netewe sedema hebûn nebûnê ye. Ger Komara Tirkiyeyê dest ji vê îdeolojiya xirufî berde jixwe dê pirsgirêka kurd li holê nemîne."

Demirtaş di rewşeke dijwar de xebitîna Serokê Bajaran pîroz kir, diyar kir ku ew kedeke gelek mezin didin. Selahattin Demirtaş da zanîn ku niha nêzî 7 hezar partiyiyên wan girtî ne, li Mêrdînê 7 serokên bajêr li heman girtîgehê, serokê 8'emîn niha li peywirê ye, em di rewşeke wisa de dixebitin.

Hejmara şaredariyên BDP'ê

Hevserokê BDP'ê qala peywira Serokên Bajaran û hilbijartina herêmî ya sala 2014'an de jî kir û wisa got: "Serokwezîr Recep Tayyip Erdogan di civîna Serokên Partiyên xwe de şaredarên me wekî hedef nîşan da. Ev ne bûyereke ji rêzê ye. Gere em cidî li vê binêrin. Jixwe sedemeke din a komkujiya siyasî ew e ku bike ku Şaredariyên BDP'ê nekarîn bixebitin. Li bajarên ku şaredarî di destê BDP'ê de ne qeymeqam û walî wekî serokên AKP'ê dixebitin. Gere em dijî vê polîtîkaya qirêj a AKP'ê derkevin. Di dema ku AKP şaredariyên me ji xwe re wekî hedef nîşan dide de divê em hejmara şaredariyên xwe derxin du qatî. Gel ne li bendê ye ku BDP van şaredirayên xwe biparêze, ew dixwazin em derxin du qatî.

Xebata ji bo şaredariyên nû

Demirtaş got ku di meha pûşperê de ewê konferansa şaredariyên herêmî li dar bixe, 3 rojan pirsgirêkên wan nîqaş bike û wisa got: "Li hin bajar û navçeyên emê zûtir dest bi xebata hilbijartina şaredariyê bikin. Gel li aliyekê li benda fêdekariya têkoşînê ye, li aliyê din jî li benda xizmetê ye. Gelek cihên ku emê yekem car bi dest bixin hene û emê xebateke xweser ji bo van deran bidin dest pê kirin.