Enqere
Mebûsê BDP'ê yê Amedê Altan Tan, diyar kir ku Waliyê Amedê bi qedexekirina 4 daxwazên kurdan ên makezagonî rayeya xwe derbas kir.
Tan li ser kapmanyaya 4 daxwazên kurdan ên ji aliyê partiyên siyasî yên kurdan û saziyên kurdan ve hate destpêkirin û ji ailyê Waltiyê Amedê ve hate qedexekirin li Meclisa Tirkiyeyê civîna çapemeniyê li dar xist.
Altan Tan, diyar kir ku kesên tên Komîsyona Makezagonê ya Meclisê dibêjin "Li vir hemû raman çiqas dijber jî bin hûn dikarin bêjin û hûn serbest in" û wiha dom kir: "Çi bû, hinek tirsiyan. Dewleta kûr û ramanên fitne û fesat çareke din xwe nîşan da."
Mebûsê Amedê Tan, anî ziman ku Waliyê Amedê 4 daxwazên kurdan ji ber ku li dijî zagona partiyên siyasî ne qedexe kir û got: "Waliyê Amedê bi vê yekê rayeya xwe derbas kir. Hundê nêrînên xwe bê şîdet û di çarçoveya zagonan de li ser kaxizan binivîsîn û ji welatiyan re pêşkêşî îmzekirinê bikin. Yên dixwazin îmze bikin ên dixwazin îmze nekin. Lê Waliyê Amedê derdikeve dibêje ev yek sûc e. Wê demê welatî dê çawa ramanên xwe bêjin. Ez vê yekê pêşkêşî Serokomar, Serokwezîr û Serokê Meclisê dikim. Waliyên herêmê ji zû de ye hedê xwe derbas kirine. Ew bi gelê herêmê re şer dikin û dibêjin qey ev jî tiştek e."
Partiyên siyasî û saziyên kurdan di metna ji bo îmzeyê hatibû amadekirin de ev daxwaz rêz kiribûn:
Bila mafê perwerdehiya bi kurdî bê qebûlkirin.
Bila kurdî di qada fermî de bê bikaranîn.
Di zagona bingehîn de rê li ber kurd xwe bi xwe bi rê ve bibin bê vekirin
Rêveberiya herêmî bê qebûlkirin.