Cemil Oguz

31'emîn Festîvala Fîlman a Stenbolê bi dehan fîlmên bi kurdî dike mêvanên xwe.
Festîval îsal di navbera 31 adar û 15'ê avrêlê de li dar dikeve. Di festîvalê de li dor 200 fîlm hene ku dê derkevin pêşberî temaşevanan. Di nav van fîlman de bi ser dehan re fîlmên ku yek jê kurdî bi çend zimanîne hene. Hin ji van bi temamî bi kurdî ne. Ji van fîlman hin derhênerên wan kurd in fîlmên xwe bi kurdî, yan bi zimanê kurdî-tirkî, hin derhêner ne kurd in lê di fîlm de digel zimanek din kurdî jî bikaraniye. Di nav van fîlman de hin di beşa Pêşbaziya Neteweyî de, hin li derveyî pêşbaziyê têne nîşandayîn û hin jî belgefîlm in loma di Beşa Belgefîlman de têne nîşandayîn.
Me ji lîsteya fîlmên festîvalê ev fîlm neqandin û em pêşkêşî we dikin; pêşniyarê ji bo temaşekirinê dikin. Vane ew fîlm (Not: Piştî kunyeyê, dîrok, saet û salona sînemayê me rêz kiriye.):

GELECEK UZUN SURER
Derhêner: Ozcan Alper / Lîstikvan: Gaye Gursel, Durukan Ordu, Sarkis Seropyan / 108 dq / Tirkî-Kurdî-Gurcî
13.04.2012, 16:00, Beyoglu
Fîlmê derhêner Ozcan ku di beşa Di Sînemayê de Mafên Mirovan de tê nîşandayîn temaşevanan bangî rûberîkirinê dike. Sumru ku ji bo berhevkariya klaman diçe Amedê dibe şahidê "şerê ku nav lê nehatiye kirin" û di dawiyê de jiyana wê jî diguhere.
Fîlmî heta niha gelek xelat girtine.
SÎMÛRG
Derhêner: Ruhi Karadag / Lîstikvan: Ali Ekber Akkaya, Çigdem Kazan, Refik Unal / 104 dq / Tirkî-Kurdî
09.04.2012, 21:30, Beyoglu
Rojnameger û derhêner Ruhi Karadag di "Sîmûrg" de çalakiya rojiya mirinê ku di sala 2000'î de li Girtîgeha Bayrampaşayê li hemberî Girtîgeha Tîpa F hatibû dest pê kirin û "Operasyona Vegera li Jiyanê" ku piştî vê hat li dar xistin nîşan dide.

Ez Firiyam Tu Ma Li Cih
Derhêner: Mizgîn Mujde Arslan / Beşdar: Halime Arslan, Şukru Arslan, Mizgîn Mujde Arslan / 81 dq / Kurdî-Tirkî
12.04.2012, 16:00, Atlas
Ev fîlm çîroka jinek ku qet bavê xwe yê gerîla nedîtiye pêşkêş dike: Jin di rêwêtiya ji Stenbolê heta Qampa Mexmûrê ya Penaberan li ser bavê wê yekî çawa bû, jê hez dikir yan na difikire û digire bin lêpirsînê. Ev rêwîtî dike ku ew bi yê herî nêz re rû bi rû bibe.

RÊÇ
Derhêner: M. Tayfur Aydin /Lîstikvan: Necmettin Çobanoglu, Bilal Bulut, Melahat Bayram / 87 dq / Kurdî-Tirkî
11.04.2012, 13:30, Atlas
Şaristan ku bi zorê ji gundê xwe hatiye koçkirin êdî dixwaze here gundê xwe. Serê sibêyek tevî kurê xwe Mîrza û neviyê xwe Hêvî ber bi Batmanê ve dikeve rê. Hemû razên der barê Şaristanê de di rê de dê derkevin pêşberî temaşevanan.

BABAMIN SESİ
Derhênerler: Orhan Eskikoy & Zeynel Dogan / Lîstikvan: Basê Dogan, Zeynel Dogan, Gulizar Dogan / 88 dq / Kurdî-Tirkî
11.04.2012, 19:00, Atlas
Orhan Eskikoy ku bi fîlmê "Du ziman û baholek" bal kişandibû vê carê tevî Zeynel Dogan dîsa çîrokek rastî derdixe pêşberî temaşevanan ku ev çîrok çîroka malbata Zeynel Dogan a bi xwe ye. "Babamin Sesi" (Dengê Bavê Min) ku li ser dîroka 30 salan a malbateke kurd-elewî, di heman demê de çîroka kurekî ye ku bi kasetên ku bavê wî ji xerîbiyê şandine li dengê xwe digere. Fîlm serdema ji Bûyerên Mereşê heta sala 2009'an radixe pêşberî temaşevanan.

ANA DİLİM NEREDE?
Derhêner: Veli Kahraman / Beşdar: Mustafa Kahraman & Hatice Kahraman /  61 dq / Tirkî-Kurdî
10.04.2012, 13:30, Atlas
Mistefa ku hîn dibe zimanê wî bi têkçûnê re rû bi rû ye, xwe wekî berpirsê vê yekê dibîne ku wî ev ziman bi zarokên xwe nedaye hînkirin. Di vê kêliya ku êdî gihîştiye dawiya jiyana xwe bi qasî ku di bîra wî de maye vî zimanî tomar dike. Fîlm qedexeya li Tirkiyeyê ya li ser zimanê kurdî tîne ziman.

KADİFE
Derhêner: Erdogan Kar / Lîstikvan: Aytaç Oztuna, Emre Ozcan, Yavuz Akçay / 90 dq / Tirkî-Kurdî
12.04.2012, 11:00, Beyoglu
Di van 30 salên dawî de hema bibêje ji her malbatê kesek jiyana xwe ji dest daye. Ji malbata Dayika Qedîfe jî winda hene; kurê wê Celal piştî li çiyê jiyana xwe ji dest dide, neviyê wê Gul Cemal jî dide ser rêza bavê xwe û diçe çiyê. Ji bo Dayika Qedîfe du tişt girîng in: Berdewamkirina nefşê û xwedîlêderketina emaneta ji kurê wê maye. Bi vê extiyariya xwe ji bo kurê xwe bi paş ve bîme siwarê qantirek dibe û berê xwe dide çiyê.

YANGIN VAR
Derhêner: Murat Saraçoglu / Lîstikvan: Osman Sonant, Nesrin Cavadzade, Yavuz Bingol / 98 dq / Tirkî-Kurdî-Gurcî
14.04.2012, 11:00, Beyoglu
Kesek ji Behra Reş diçe Amedê ku Şaredariya Amedê erebeyeke agirtemirandimê diyariya wan kiriye. Erebeyê ji Amedê dibin Behra Reş lê di rê de rastî gelek tiştan tê. Komediya di rê de mijara fîlm e.

MAR
Derhêner: Caner Erzincan / Lîstikvan: Volga Sorgu, Yilmaz Şerif, Begum Kutuk /  100 dq
11.04.2012, 11:00, Beyoglu
Li ser 'sînor' malbatek... Sê mêr... Guven, Yilmaz, Hecî Xelîl... Fîlm li ciheke biçûk çîroka van kesan ku ew bi xeyal û hêviyan dijîn pêşkêş dike.

ICH LIEBE DICH
Derhêner: Emine Emel Balci/ Lîstikvan: Saide Guneş, Muslum Guneş, Enver Çolak / 74 dq / Tirkî-Kurdî-Almanî
13.04.2012, 21:30, Pera
Li gundekî Rihayê jin ji bo bigihîjin mêrên xwe yên ku çûne Almanyayê hînê almanî dibin. Fîlm çîroka wan pêşkêş dike. Jin dê bikevin ezmûna zimanê almanî, dê bi ser bikevin an na meseleyeke din, bi ser bikevin jî dê çawa herin ew jî tiştek din e. Bi vî awayî jin digel kurdî ku zimanê wan ê zikmakî ye, di nav bera tirkî, almanî û kurdî de diçin û tên.

TURKÇE: PEKİYİ
Derhêner: Murat Bayramoglu / 27 dq / Tirkî-Kurdî
13.04.2012,11:00,Pera
Bi salan kurdî hate qedexekirin, li gelek malan jî zarokan ji kurdî, ji malbata xwe ya kurd fedî kir û heta ji dest hat tirkiya xwe pêş ve bir. Yek ji wan kesan jî Nurcan e ku niha êdî hay ji xwe û ji kurdiya xwe heye lê bi kurdî nizane. Nurcan dê bi pîra xwe ya sed salî, ya ku peyveke jî bi tirkî nizane dê çawa têkilî deyne. Belgefîlmê "Turkçe: Pekiyi" (Tirkî: Baş) vê mijarê digire dest.

1+8
Derhêner: Angelika Brudniak & Cynthia Madansky / 126 dq / Tirkî-Kurdî-Erebî-Farisî-Azerî-Ermenî-Gurcî-Bulgarî-Yewnanî
12.04.2012, 19:00, Pera
Belgefîlmê "1+8" li ser heşt cîranên Tirkiyeyê hatiye kişandin, di heşt beşan de rêwîtî ber bi heşt sînoran tê kirin. Kesên hem li Tirkiyeyê hem li van heşt welatên wekî Yewnanistan, Bulgaristan, Gurcistan, Ermenistan, Azerbaycan, Îran, Iraq û Suriye dijîn dibin mijara belgefîlm. Tiştên mirovan li her du aliyan ji hev dûr xistine û tîne ba hev, nasname, jixwe hesibandindin, pirsgirîka neteweyî... Belgefîlm dest diavêje van meseleyan

Goristan / Jiyana li ser miriyan
Derhênerler: Mehmet Salih Çelik & Sevgi Akdaş /  17 dq / Kurdî
13.04.2012, 11:00, Pera
Piştî valakirina gundan hin gundiyên ku li taxa Deriyê Mêrdînê ya Amedê bi cih bûn bi xebata li nav goristanê debara xwe dikin. Fîlm li ser çîrokan wan kesên li ser mirinê jiyaneke nû derdixin holê disekine.

ANLAT BANA–DIVMELER / AGITLAR / HİKÂYELER
Derhênerler: Ugraş Salman & Mehmet Sait Tunç /  50 dq / Kurdî-Erebî-Suryanî
12.04.2012, 13:30, Pera
Belgefîlm li ser deqê ku bi sedan salan e li bajarên kurdan bûye çandeke bingehîn disekine, bi nûnerên dawî yên vê kevneşopiyê re diaxive, digel deqan çîrokên ku ew qal dikin, şînên ku wan girtine, lorik û çîrokên wan derdixe pêşberî temaşevanan.