Stenbol

Hunermend Cîhan Aymaz duh êvarê li perava behrê Kadikoya Stenbolê hatibû kuştin, îro ew li cihê hat kuştin hat bibîranîn.

Endamên Îtîfaqa Ked û Azadiyê li Rihtima Kadikoyê, cihê ku Aymaz hat kuştin ew bibîr anî û daxuyanî da çapemeniyê.

Li wê derê pankarta "Li hemberî êrîşên nijadperest ên dijî stranên zimanê zikmakî, emê jiyaneke ku têde bi azadî stran bêne gotin ava bikin" vekirin. Dîsa dovîzên "Emê pergala we ya dikuje xira bikin", "Emê ji kesên Cihan Aymaz kuştine hesabê bipirsin" vekirin û diruşmên "Emê hesabê Cihan bipirsin", "Bijî biratiya gelan", "Li hemberî faşîzmê mil bi mil", "Ji bo huner û hunermend azadî" bilind kirin.

Hevserokê Yeşîl Sol Partî yê Kadikoyê Koray Turkay got ku di vê têkoşînê de kurdan gelek berdêl da û ev yek lê zêde kir, "Cihanê ku ji nava me bar kir humermerdê li kuçeyan bû. Bi taybetî li Kadikoyê her kesî ew nas dikir, hevalekî me bû ku bi kurdî distra. Wî dikir ku li kuçeyê em dengê muzîka kurdî bibihîzin. Bi vî awayî dijî feraseta yekperest bû. Cihanî serî netewand, yên ketin erdê serî netewandin, em jî serî natewînin. Lê emê vê pergala yekperest û faşîst li erdê xin. Emê hesabê komkujiyên kirine yek bi yek bipirsin."

Daxuyaniya li ser navê îtîfaqê ji aliyê Ozlem Ozdemir ve hate xwendin.

Di daxuyaniyê de hate gotin ku Mehmet Caymaz ji wî strana "Olurum Turkiyem" (Ez dimirin Tirkiya min) xwestiye, lê dema Cihan Aymazê ku bi salan e li kuçeyên Kadikoyê stranên kurdî distrê, nexwestiye ev strana ku bûye sembola feraseta yek perest û faşîzmê bistrê, lêma jî nîqaş çêbûye û kujer kêr li dilê Cihan daye û ew kuştiye. Di daxuyaniyê de hat gotin ku ew vê wehşeta ku encama zimanê nefterê yê desthilatdariyê ye şermezar dikin

Hat gotin ku heta li van kuçeyan, qadan bi azadî stran bêne vegotin ew dê têkoşîna xwe bidomînin

Piştî daxuyaniyê hevalê muzikar ê Aymaz ê bi navê Ahmed Bedirxan strana "Rinda Min" ku Aymazî gelek jê hez dikir stran.

***

Nûçeya Eleqedar:

- Hunermendekî kurd li Stenbolê hat kuştin