AMED
Mebûsê BDP'ê yê Amedê Altan Tan û Şaredarê Sûrê Abdullah Demîrbaş bi keyayên navçeya Sûrê re civîn li dar xist. Demirbaş diyar kir ku li Amedê dagirkirina peyarêyan welatiyan bêzar dike û ji ber vê yekê welatî li nava rê dimeşin.

Şaredariya Sûrê li Otela Madî civînek li dar xist. Mebûsê BDP'ê yê Mêrdînê Altan Tan, Şaredarê Sûrê Abdullah Demîrbaş, Cîgirê Hevserokên BDP'a Amedê Ahmet Gezen, Serokê BDP'a Sûrê Adnan Guler, rêveberên BDP'ê yên bajar û navçeyan û keyayên taxan tevlî civînê bûn. Berî civînê xebatên şaredariyê yên 8 salan bi sînevîzyonê hatin nîşandayîn.

Piştî sînevîzyonê Şaredarê Sûrê Abdullah Demîrbaş axivî û got ku li Amedê dagirkirina peyariyan welatiyan nerehet dike û wiha dom kir: "Ji ber vê yekê jin li nava rê dimeşin. Ligel hişyariyên şaredariyê dîsa jî peyarê tên dagirkirin. Dema ku em ceza jî didin dibêjin şaredarî bi me re mijûl dibe. Mafê tu kesî nîn e ku gel nerehet bike. Peyarê yên gel in. Em ji we dixwazin hûn van kesan hişyar bikin. Em wekî şaredarî naxwazin ceza bidin kesekî û dikana wî bigirin. Em dixwazin hûn vê yekê ji esnaf û gel re bêjin. Em di xizmeta gelê xwe de ne. Em bi piştgiriya we di vê rê de dimeşin. Dibe ku kêmasiyên me hebin. Tu kes bê kêmasî nîn e. Bajarê Amedê bajareke kevnare û ji bo vê çi bikin jî têre nake. Em wekî sûrê butçeya me kêm e lê ji bo çareserkirina pirsgirêkan û zêdekirina qelîteya xizmetên me em heta dawî zorê didin derfetên xwe. Di vî warî de bila şika tu kesî nîn be."

Mebûsê BDP'ê yê Amedê Altan Tan jî diyar kir ku civînên şaredariyê yên wisa ku têde pirsgirêkan bi gel re parve dike gelek girîng in û divê her kes xwedî li Amedê derkeve.