Diyarname

Weşanxaneyeke din li weşanxaneyên kurdî zêde bû: Pall Weşan. Pall Weşan di payîza 2022’yan de li Amedê hatiye avakirin. Ewê pirtûkên edebî, fikrî, dîrokî û qadên din ên zanistên civakî biweşîne. Pall Weşanê li ser armanca xwe wisa gotiye, “Armanca wê ew e ku kitêbên bijare yên di merhaleyeke fireh a xwendin û edîtoriyê re derbas bûne, bi bergên xweser û sê formatên cuda yên wekî e-kitêb, kitêba dengî û kitêba çapkirî bigihîne ber destê xwîneran.”

Pall Weşanê niha bi 3 pirtûkan dest bi weşanê kir. Ji van du heb çîrok in û pirtûka din jî roman e.

Va ne bi kurtahî ew her sê pirtûk:

“ŞEVA DIZÊN SOLSTÎSÊ”

Gundekî ku qet lê nabe şeveq û gava dibe şeveq qet lê nabe êvar; galgalên li ser çîroka çîrokeke ku qet neqewimiye; Benjamin Franklin, Thomas Edison, Don Quijote û Sancho Panzayê ku rêya wan bi gundekî Kurdistanê dikeve û aqûbeta wan li ber gopalê deradetî yê Pîra Fatim ji nû ve saz dibe; flanorekî ku her di takecîhana xwe de çerx dibe û bi semt û hemd tim dikeve seyra nîşaneyên derdora xwe; bîrhatinên “zarokekî” hezar û bîst û yek salî yê li ber çoka Pîra xwe derheqê miriyan û binaxkirinê de; nivîskarekî li pey lehengê xwe yê ku bi salan ji bankamatîkekê dide dû yeke din û tim li pereyên hûr digere; nehwirandinên ji ber saw û sawêrekê mayî; mêşên ku dawî li desthilata famîlyaya xwe tînin û ew jî bi wan re dicehimin?...

Desteyek çîrok di pirtûka “Şeva Dizên Solstîsê” de derdikevin pêşberî xwendevanan.

*

“SIYA YÊ DIN”

“Siya yê din” pirtûka çîrokan a Hesen Ildiz e. Di çîrokên kupkurt ên Ildiz de taybetiyeke girîng xwe dide der ku meriv dikare wekî krîtereke serkeftinê ya ji bo vê cureyê qebûl bike: Gava xwendina çîrokan xelas dibe, çîrok bi xwendevanan dest pê dike. Bi gotineke dîtir ev çîrok, ji bedêla ku bi dorsînoriyeke çar-pênc hevokî an jî yek-du pasajî çîrokekê ji xwendevanan re vebêjin, çîroka di dilê xwendevanan de derdixin holê û bi vî awayî temam dibin. Balkêş e û nivîskar tim dilê xwe dibijînin vê rewşê. 

Ev çîrokên ku ji meseleyên civakî û siyasî bigire heta bi meseleyên têra xwe şexsî û endîşeyên biçûk ên jiyana rojane çarçoveyekê xêz dike, bi vî awayî kariye panoramaya qelebalix, belawela, dudil lêbelê rasteqîn û berfireh neqil bike.

*

“LERZ”

Gula Strîstanka ya piştî gelek kêferatan terka mêrê xwe dike û du zarokên xwe bi cih dihêle, ji Stembolê dide rê tê li Diyarbekirê bi cih û war dibe. Bi israr û hewldana hevaleke xwe dest pê dike romaneke otobiyografîk dinivîse lê çi bigire hê di nîvê rê de nikare projeya romana xwe bibe serî. Romana nîvco ya ku paşê dê navê Lerzê bigire, diçe ber destê Brahîm Aramê nivîskarê naskirî li Diyarbekirê û Aram romanê ji cihê mayî temam dike, li ser navê xwe dide çapkirin...

- Şeva Dizên Solstîsê / Bilal Nergizli / Çîrok / 64 rûpel / 2023

- Siya yê din / Hesen Ildiz / Çîrok / 80 rûpel / 2023 

- Lerz / Qasim Pîro / Romar / 144 rûpel / 2023