Diyarname

Tûrnûvaya Kûpaya Cîhanê ya 2022’yan ku ji aliyê FIFA’yê ve tê li dar xistin îsal mazûvan Katar e. Lê di heman demê de kampanyaya “Boykot Katar” dest pê kiriye. Di maçên lîga mezin a Almanyayê Bundesligayê de ev kampanyaya boykotê hatiye dest pê kirin û pankantên bi vî rengî têne vekirin.

Kilûbên alman li ser binpêkirina mafên mirovan ên li Katarê û li ser metirsiya li ser hawirê disekinin, loma kampanyayeke wisa dane dest pê kirin. 

Ji ber ev sedemên li Katarê kampanya li dar ketiye:  

- Mafên jinan, mafên karkerên koçber têne binpêkirin.

- Demokrasî binpêkiriye.

- Li stadên bi klîma li darxistina maçan bandorê li hawirê dike.

- Îdîaya “Ji bo Katar vê tûrnûvayê bibe li wir li dar bixwe rişwet daye delegeyên FIFA’yê”.

- Tîmên Ewropayê ji FIFA’yê re dibêjin ku pirsgirêka mafên karkerên koçber nehatiye çareserkirin.

- Di sala 2010’an de biryar hat dayîn ku tûrnûvaya 2022’yan dê li Katarê li dar bikeve. Ji wê rojê de heta niha 6 hezar ûf 500 karkerên koçber li Katarê mirine. Lê Neteweyên Yekbûyî dibêje ev reqem hemû ne di kar de, yan jî di projeyên sazkirina stadan de mirine. Katar îdîa dike ku tenê 37 kes di dema çêkirina stadên ji bo Kûpaya Cîhanê de mirine.

‘Divê mafên mirovan bigirin ber çavan’

Li aliyê din ji bilî klûb û temaşevanên wan, lîstikvan jî piştgirî didin kampanyayê. Lîstikvanê alman ê berê Philipp Lahm ku 8 sal berê ligel tîma neteweyî ya Almanyayê Kûpaya Cîhanê bi dest xistibû li ser vê meseleyê dibêje, “Ez wekî endamekî heyetê, yan jî wekî temaşevanekî ezê neçim Katarê. Di biryardayîna tûrnûvayê li welatekî de divê xala sereke mafên mirovan be. Ger mafên mirovan nîn be, divê tûrnûva ne li wir be.”

Spanya û Fransa maçan nîşan nadin

Hin bajarên li Spanya û Fransayê ragihandine ku dê maçên tûrnûvayê li bajarên xwe nîşan nedin. Di kampanyayê de bang tê kirin ku temaşevan maçên li TV’yan temaşe nekin, ji bar û caweyan jî dixwazin di dema maçan de televîzyonan venekin.

FIFA’yê bangek nû kir

Di dema ev nîqaş têne kirin de FIFA’yê nameyeke ji bo welatên beşdarî Kûpaya Cîhanê bûne re şand û got ku ne li ser mijarên din, li ser sporê bisekinin û bala xwe bidin vir.

Li gor bernameyê tûrnûvaya Kûpaya Cîhan Katar 2022 dê 20’ê vê mehê dest pê bike û 18’ê meha pêşiya me bi dawî bibe.