Diyarname
Pirtûkek li ser metnên kevn niha li ber destan e ku bi sernavê "Nameya Serencamê yan Kelama Xezîneyê, Yek ji metnên kevin ên Yarsanan (Ehlê Heq)" hatiye weşandin. Pirtûka ku lêkolîn û şiroveya Dr. Sidîq Sefîzade (Borekeyî) ye, ji aliyê Muhsîn Ozdemîr û Sabîr Ebdulahîzad ve ji bo kurdî hatiye wergerandin.
Baweriya Yarsanî û Ehlê Heq ji kok de pişta xwe dide zerdeştiyê, di nav demê de li cihên cur bi cur her li gor xwe hatiye nirxandin û şirovekirin. Loma navên cuda lê tê kirin. Niha pirtûka li ber dest îdîa dike ku ev pirtûk di warê vê baweriyê de kêm guherbar e, loma jî bingehîn e. Li ser vê wisa hatiye gotin, "Kitêba Serencamê ji bo kurdên elewî ku baweriya wan ji zerdeştiyê hatiye roja îroyîn hatiye, çavkaniyeke bêhempa ye. Ev bawerî beriya Şah Îsmaîlê ku di sal^ne 1500'î de li wê erdnîgariya ku kurdên elewî îro lê dijîn ango ji Bexdayê heta Meraşê lê bûyî desthilatdar hebû. Ev bawerî û teşeya jiyana wê di Serencamê de bi awayekî zelal tê vegotin. Lê mirov nikare bibêje ku bandora dîn û baweriyên din li ser vê baweriyê çênebûye."
Pirtûk dibêje ku baweriya elewîtî li Kurdistanê di nav nifûseke berfireh de heye û van lê zêde dike: "Li derveyî erdnîgariya Kurdistanê, li Xorasanê û herêma sirgûnê Cîhanbeylî û Heymanayê û li Rojhilat li Kirmanşanê kurdên elewî yên Yarsan-Ehle Heq dijîn. Herêma bakurê Dêrsimê û hemû rojava û rojavayê bakurê wir kurdên elewî ne, ev qad; ji Dîlokê heya Zarayê wek xetekê dirêj dibe. Çand, jiyan û baweriya van deveran hema hema yek bi yek mîna hev in."
Pirtûka li ber dest bingeha xwe ji "Serencam" a ku ji aliyê Siltan Îshaq ve hatiye nivîsîn digire. Li gor pirtûkê "Serencam" a Îshaq 200 rûpel bû û wî di sedsala 14'an de bi zaravayê hewramî nivîsandiye; ji helbestan pêktê.
'Nameya Serencamê' a Dr. Sidîq Sefîzade (Borekeyî) niha bi werger û amadekariya Muhsîn Ozdemîr û Sabir Ebdulahîzad ji Weşanên Sîtavê derket û di vî warî de bersiva pirsên li ser vê baweriyê dide.
- Nameya Serencamê / Dr. Sidîq Sefîzade (Borekeyî) / Werger Muhsîn Ozdemîr, Sabir Ebdulahîzad / Weşanên Sîtav / 663 Rûpel / Rêbendan 2021