Diyarname

Lîstika "Mem û Zîn"ê ku bi şêweya dengbêjkî û vebêjkî bi derhêneriya Mîrza Metîn û bi performansa lîstikvanên Şermola Performansê hat amadekirin li Batmanê derdikeve ser dikê. Lîstik cara yekem 3'yê mehê saet 19.30 de li Batman Yenîsaneyê ye.

KLAMEK, STRANEK Û DESTANEK
Çîroka Mem û Zînê bi sedan salan e li nav kurdan e û bi cureyên cur bi cur ên hunerî tê amadekirin. Çîrok heta niha bû pirtûk, bû fîlm, bû lîstika şanoyê, bû mijara dansê û niha carek din bi cureyeke nû derdikeve ser dikê. Niha Şermola Performansê bi cureyeke nû lîstik amade kir û derxist ser dikê. Heta niha bi sedan dengbêj û çîrokbêjî Mem û Zîn vegotiye ku ev destan bingeha xwe ji destana Memê Alan girtiye. Dengbêj Reso jî yek girîngtirîn ji dengbêjan e ku destana Mem û Zînê bi klamkî û vebêjkî îcra kiriye. Niha bi derhêneriya Mîrza Metîn lîstika Mem û Zînê hat amade kirin ku ev lîstik xwe dispêre pirsa “Kilamek, stranek, çîrokek ango destaneke gelêrî, bêyî ku wekî teksteke şanoyê ji nû ve bê nivîsandin, çawa dikare bi rengekî nûjen bê sehnekirin?"

Di bin rêveberina Mîrze Metîn de lîstikvanên Şermola Performansê li ser vê yekê xebitîne û lîstik amade kirine.

XEBATA SALEK

Mîrza Metîn di bin banê Şermola Performansê de ev salek e wekî online ders dida şanogeran. Metîn li ser dîroka şanoyê, nivîsîna dramatîk û li ser teoriyên lîstikvaniyê ders dan şanogerên li bajarên cur bi cur. Bi saya van xebatan nivîskar û derhênerê Şermola Performansê Mîrza Metîn lîstikvanên wekî Pelda Bal, Kenan Demîr, Ronî Dildar û dramaturg Zelal Angay nas kir û biryar da ku li Batmanê bi wan re li ser lîstikeke bixebite. Di dawiyê de li ser vê lîstikê xebitîn û lîstik amade bû.

Lîstika Mem û Zînê 3'yê mehê yekemîn car saet 19,30 de dê li Yeni Sehneya li Batmanê bê lîstin. Paşê rojên 4, 16 û 30'ê mehê dê dîsa li heman cihî bê lîstin.

Derhêner Mîrza Metîn ku ev demek bû li Almanyayê bû ji bo vê xebatê hat Batmanê û ji niha û pêde ew ligel lîstikvanên Şermola Performansê ligel Almanya û Stenbolê dê li Batmanê jî xebatên xwe bidomîne

KUNYE:

Lîstik: Mem û Zîn

Çavkanî: Dengbêj Reso

Konsept/Derhêner: Mîrza Metîn

Lîstikvan: Pelda Bal, Kenan Demir, Roni Dildar

Dramaturg/Alîkara Derhêner: Zelal Angay

Koreograf/Rahêner: Arjen Brûsk

Sêwirînerê Ronahiyê: Mîrza Metîn

Fotograf: Bariş Evîz

***

MAIL: diyarname@diyarname.com