Diyarname

Weşanxaneya Roşna ke navendey cay Amed de wa 3 kitabê neweş vetî. Kitabê Evdî Hespera, Mehdî Ozsoy û Saîd Altunî resay verê destê wendoxan.

HÎKAYEYÊ EVDÎ HESQERA

Evdî Hesqera eşîrê Îzolan ra wo, bi xo kurmanc o, kirmanckî/zazakî musawo û enka kitabêke bi kirmanckî veto. Zehf zehf tay kurmancî estê ke kirmanckî mûsenê. Ma nêzanê heta enka yew kurmancî hîkay kirmanckî nistê û kitab veto yan nê la Hesqerayî ene jo ard ca, kitab vet.

Kitabê Evdî Hesqera bi namey "Merhebaya nîmeyê şewe" Weşanê Roşna ra veciya. Kitab de 22 hîkayeyî estê. 

Niştox Evdî Hesqera di hîkayeyan de teknîkanê ciyayan ceribneno. Zafê înan hîkayeyê kilmekê mînîmal ê. Vatişê ci krîstalîze yo. Derg û dila qiseykerdişê mesela ra vêşêr yew rewşe sey fotografî nîşan dano. Cuya ma ya ewroyî de têkilîya mabeynê însanan ra, haletê derûnîya ma ra vîstikêk nîşan dano û vîyareno. Derdê ci îqnakerdişê wendoxî nîyo. Wexto ke merdim yew hîkayeya Evdî Hesqerayî waneno qedêneno, lewanê merdimî ser o yew peşmirîyayişo şîrin maneno. 

DÎWANÊ MEHDÎ OZSOY

Mehdî Ozsoy di sera 1944'inan de Pali de ameyo dinya, 2009 de Diyarbekir de şiyo rehmet. Wextê xwu de heta lîse wendo, dima sey malim tayin biyo, demêko kilmek malimtî zî kerda. Mehdî Özsoy destpêkê serrana 1970an ra dest bi nûştişê şiîran kerdo. Gelek şiîrî bi tirkî û kirdkî nûştê. Labelê nûştê û nimitê. 

Weşanê Roşna dîwaro yewîn ê Mehdî Ozsoy di serey 2014 de çap kerd bî û enka zî dîwanê yê diyin bi namey "Vengê Welatê, Dîwan II." çap kerd. Di enî dîwanî de 126 şiîrî estê.

Roşan Lezgîn li ser dîwanê Ozsoy ana vano, "Eke hetê tesnîfkerdişî ra biewnîyo edebîyatê Kirdkî ra, şiîrê Mehdî Özsoyî kategorîya edebîyatê şarî de şiîrê bi weznê hece yê, o zî şaîrêko edetî yê şarî yo. Çimkî, hema vajêne heme şiîrê ci qit’ayê biqafîye yê ke weznê hece de nusîyayê. Şiîranê ey de formê şiîra klasîke yê sey xezel, qesîde yan zî musamatî çin ê. Dîwano verîn de, menzûmeya Mem û Zîne ke bi şeklê beytan yew hîkaye qisey bena belkî formê mesnewî de bihesibiyo la parçeyê ke yew mesnewî anê pê, ma vajin dîbace, tewhîd, munacat, neat, medhîye, sebebê teelîfî, axazê destan û xatime tede çin ê. Coka ma eşkenê vajê, Mehdî Ozsoy şaîrê şarî yo, şiîrê ci zî edebîyatê edetî yê şarî yê. Şiîre, Mehdî Özsoyî rê wasitaya vatişî ya; bi şiîre vateyê xwu yan zî vateyê xwu bi şiîre vano. Coka xasîyeto ke Mehdî Özsoy edebîyatê ma de keno şaîrêko pîl, helwêste (duruş; tavır) û helbet mîlîyetperwerî ya. Mehdî Özsoy bi ziwanê şarê xwu problemê sereke yê miletê xwu îfade keno; o şaîrêko şidênayeyo milî yo."

JIYANEY SEÎD ALTUNÎ

Kitabo bîn ke Roşna ra veciyayo Aydin Baturî kerdo hedre û bi namey "Seîd Altun: Emir Şi" hamey çapkerdin.

Kitab der heqê jiyaney hunermend Seîd Altunî de yo. Seîd Altun Çewlîg ra, mintîqeyê Verardî ra, Lotan ra yo. Serra 1949 de ameyo dinya. Teyna mektebo verîn qedênayo. 1966 de dest bi vatişê deyîran kerdo. Roja 03.04.2018 de Diyarbekir de şi rehmet. Kitabê derheqê heyatê Seîd Altunî de, panc qisman ra ameyo pê: hîrê Qismanê sereke, Îlawe û Fotografî. Nûştox Qismo verîn de heyatê Seîd Altunî, mintîqe û dewa ey dano şinasnayiş. Qismo diyin de deyîranê Kirdkî tesnîf keno. Qismê hîrêyin de deyîrê ke Seîd Altunî kasetan de wendê yew bi yew neqil keno. Qismê Îlawe de di roportajî estê. Qismê Fotografan de zî fotografê derheqê Seîd Altunî de û yê albumanê ey estê.

Weşanxaneya Roşna ke navendey cay Amed de wa, heta enka dewrê 70 kitabî vetê, înan ra 62 kitabî bi kirmanckîyê.

- Merhebaya Nîmeyê Şewe / Evdî Hesqera / Weşanxaneyê Roşna / 56 rîpelî / 2021/ Hîkaye

- Vengê Welatî, Dîwan II. / Mehdî Ozsoy / Weşanxaneyê Roşna /  256 rîpelî / 2021/ Şiîr

- Seîd Altun: Emir Şi / Aydin Batur / Weşanxaneyê Roşna /  184 rîpelî / 2021/ Portre