Amed
40 saziyên sivîl ên civakî xwestin ku li herêmê li hemberî ziwabûnê bi lezgînî tevdîr bêne girtin.

40 saziyên sivîl li Odeya Zerîeta Amedê daxuyaniyeke çapemeniyê pêşkêş kirin. Serokên odeyên Amed, Batman, Mêrdîn, Riha, Sêrt û Semsûrê beşdarî daxuyaniyê bûn. Serokê Odeya Senetkar û Esnafên Amedê Alican Ebedinoglu  bal kişand ser zerara mezin a li heremê û xwest ku cihên ku ketine bin bandora ziwabûnê wekî 'Herêma Afatê' bê îlankirin.

Ebedinoglu diyar kir ku ji ber ziwabûnê sedî 90 çandinî winda bûye, 2-3 meh paşê dê senayîkar jî bikevin bin bandora ziwabûnê û got ku wan li ser vê yekê ji serokwezîr û wezîran re raporan şandine.

Di daxuyaniyê de hate gotin ku di serî de Amed hemû bajarên herêmê di bin tesîra ziwabûnê de ne û wiha hate gotin; "Ziwabûna mezin ku li herêma me pêk hatiye bi xwe re pirsgirêkên cidî derxistine holê. Li Amedê 3, li Rihayê 3, li Mêrdîn û Semsûrê 1.3 mîlyon dekar erd ji vê yekê xesar dîtine. Em dema li du hefteyên borî ku baran nebarî jî binêrin em dikarin bibêjin li dor 15 mîlyon dekar erdên çandî têk çûye. Aboriya herêmê jixwe nebaş bû, vê ziwabûnê aboriya herêmî bi temamî têk bir. Em ditirsin ku bi vê yekê re serjimariya li çolterê bi temamî koçî rojavayê bike."

Her wiha Ebedinoglu ji bo tiştên ku bêne kirin jî wisa got: "Bila cihên ku ziwabûn lê çêbuye 'Herêma Afatê' bê îlankirin. Bila Komîsyoneke diyarkirina zerarê bê avakirin ku odeyên me yên zerîetê jî di navê de cih bigirin. Qewlê deynên cotkarên me yên ji bo bankeyan bi paş ve bê avêtin. Bila deynê Bag-kur, bac û deynên ji bo bankeyan ji ber vê qeyranê bi paş ve bêne avêtin, krediyeke bê faîz ji bo esnafên herêmê bê pêşkêşkirin."