Amed
Li ser mijara kuştina Serokê HEP'ê yê Amedê Vedat Aydin ku di sala 1991'ê de ji mala xwe hatibû girtin û cenazeyê wî li nêzî navçeya Medena Elezîzê hatibû dîtin niha 3 kes hatin binçavkirin. 3 kesên ku bi fermana Serdozgeriya Komarê ya Rayetaybet ve hatin binçavkirin piştî ku îfadeyên wan hatin girtin, hatin berdan. Ji bo doz bê girtin hindik dem mabû. Li ser vê agahiya nû dê heta 10 salên din jî doza Aydin bidome.

Serokê HEP'a Amedê Vedat Aydin di 5'ê tîrmeha 1991'ê de ji aliyê kesên ku di destên wan de bêtel hebûn ji mala xwe hatibû girtin û piştre jî cenazeyê wî bi awayeke îşkence lê hatiye kirin li nêzî navçeya Medena Elezîzê hatibû dîtin.

Di vê dema ku hindik mabû doza Aydin bêyî ku kes bê girtin doz bi dawî bibe, pêşketineke nû pêk hat û 3 kes hatin binçavkirin.  Nehat eşkerekirin ku ew her sê kes kengê û li ku derê hatine binçavkirin. Dozgeriya Rayetaybet a Amedê îfadeya kesên bi navên H.A., H.Ç. û M.D. hate girtin û ew hatin berdan.

Şukran Aydın teblîx da Dozgeriyê

Her wiha jina Vedat Aydin Şukran Aydin 4'ê tîrmehê teblîxa teşhîskirinê da dozgeriyê û bi vê yekê pêşî li girtina dozê hat girtin.
Parêzerê Şukran Aydin, parêzer Mehmet Arif Altunkalem li ser dozê got ku delîlên berbiçav ên der barê dozê de di Doza Susurlukê de derketine holê, gotinên tetikkêşê JÎTEM'ê û îtîrafkar Abdulkadir Aygan rewş berbiçavtir kiriye.

Parêzer Altunkalem got ku biryara qufaltina Mahmut Yildirim hatiye girtin, biryareke wisa dibe ku der barê îtîrafkar Ali Ozansoy, Fethi Yildirim û Aytekin Ozen de jî bê girtin.