AMED
Nûnerên 133 saziyên sivîl yên Amedê diyar kirin ku biryara YSK'ê ya der barê parlementerê Eniya Ked, Demokrasî û Azadiyê yê Amedê Hatîp Dîcle û biryara dadgehê ya redkirina serbestberdana parlementerên girtî, aştiya civakî û siyaseta demokratîk xistiye nava talûkeyekê.
Serokê Baroya Amedê Mehmet Emîn Aktar, diyar kir ku ji bo ew vê kirîzê bi dawî bikin dê bi Serokomarê Tirkiyeyê Abdullah Gul, Serokwezîr Erdogan û Serokê Partiyên Muxalefet re hevdîtinan bikin.

133 saziyan li Cemiyeta Rojnamegerên Rojhilata Başûr a Amedê civîneke çapemeniyê lidar xist. Li ser navê saziyan Serokê Baroya Amedê Mehmet Emîn Aktar daxuyanî xwend û biryara YSK'ê ya der barê Mehmet Hatîp Dîcle de û ya der barê parlementerên Eniyê yên ji doza KCK'ê de girtî rexne kir. Aktar got ku ji ber van biryarên nakok û şaş rageşiya civakî zêde kiriye û mafên hilbijêran hatiye binpêkirin.

Aktar, anî ziman ku YSK beyî parastina parlementer Dîcle li ber çavan bigre biryar daye û mafê wî yê parlementeriyê desteserkiriye û ev yek ji aliyê hiqûq û siyasetê ve nayê qebûl kirin. Aktar, anî ziman ku ji ber vê biryara YSK'ê ya şaş baweriya civakê ya li hemberî YSK'ê û darazê nemaye û wiha got: "Divê her kes ji vîna gelê Amedê re bi hurmet be. Tu mafê kesî tune vîna hilbijêran înkar bike û tune bihesibine. Mafê tu kesî tune ku parlementeriya parlementerê bi rêya demokrasiyê hatiye hilbijartin betal bike."

'Divê vîna gel bê kêmasî di meclisê de bê dîtin'

Aktar diyar kir ku divê berî her tiştî vîna gel li meclisê bê dîtin û 36 parlementerên ku bi dengê gel hatine hilbijartin bê kêmasî biçin meclisê. Aktar, da zanîn ku ji bo pirsgirêk bi rêya demokratîk û aştiyane çareser bibe, divê astengiyên li pêşiya siyasetê bên rakirin û pirsgirêka kurd çareser bibe. Aktar, xwest makeqanûna nû ji nû ve bê sazkirin û hemû mafên civakê yên bingehîn û mirovane di makeqanûna nû de bên mîsogerkirin.

'Ji ber ku li şûna Dîcle Eronat mazbata girt qirîz zêde kir'

Aktar, destnîşan kir ku ji ber YSK'ê parlementeriya Dîcle xist û li şûna wî mazbata da namzeta AKP'ê Oya Eronat qirîz kûrtir kir û neheqiyek mezin li hilbijêran kir. Aktar, bal kişan ser hewldanên saziyan û wiha got: "Em wekî saziyên sivîl ên civakî ji bo dawî li vê kirîzê bînin, pêwîst be em dê bi Serokomar Abdullah Gul, Serokwezîr Recep Tayyip Erdogan û serokên partiyên muxalif re hevdîtinan bikin. Em dixwazin li gorî daxwaz û vîna gel pirsgirêk bê çareserkirin."

Ji DÎHA'yê hatiye girtin