Diyarname
Kovara Forbesê lîsteya nivîskarên ku di sala 2010'an de herî zêde pere kar kirine eşkere kir. Di rêza yekemîn de Hanefi Avci, dûre Ahmet Umît û Elif Şafak tên.

Kovar ev çar sal in lîsteya nivîskarên ku zêde pirtûkên wan hatine firotin û pere kar kirine eşkere dike. Li gor lîsteya kovarê pirtûka şefê polîsan ê berê Hanefi Avci "Haliç'te Yaşayin Simonlar" bi giştî 572 hezar heb çap bûye û jê 14,3 mîlyon TL hatiye bi dest xistin. Bi vê yekê jî ew derketiye rêza yekemîn. Avci bi xêra vê pirtûkê 1,4 mîlyon TL pere kar kiriye.

Pirtûka dawî ya Ahmet Umit "İstanbul Hatirasi" bi giştî 150 hezar heb hatiye firotin. Digel pirtûkên wî yên din jî par bi giştî 318 hezar heb pirtûkên Umit hatine firotin û 5,4 mîlyon pere ji van hatiye bi dest xistin. Ji Umit re jî mîlyonek û 83 hezar TL ji telîfê maye. Bi vê reqemê Umit bûye romanûsê ku par herî zêde pere kar kiriye û di heman demê de di lîsteyê de di rêza duyemîn de cih girtiye.

Pirtûkên Nivîskar Elif Şafak yên bi navê "Aşk" û "Fîrarperest" her yek 100 hezar heb hatiye firotin û bi giştî 550 hezar heb pirtûkên wê hatine firotin. Şafak gihîştiye 4,9 mîlyon TL'yî û ji vê jêre mîlyonek TL ji telîfê maye. Bi vê jî ew bûye sêyemîn nivîskarê zêde pere kar kiriye.

Forbesê li gor îstatîstîkên Ajansa ISBN ya Wezareta Çand û Tûrîzmê lêkolîna xwe kiriye û gihîştiye vê encamê ku par 34 hezar û 863 pirtûk hatine çapkirin. Ev reqem nîşan dide ku li gor pêrar di çapkirina pirtûkan de sedî 11,4 zêdebûn heye.

Di nav lîsteya kovarê de bi rêzê van 20 kesan herî zêde pere kar kiriye: Hanefi Avci, Ahmet Umit, Elif Şafak, Turgut Ozakman, Ayşe Kulin, İskender Pala, Canan Tan, Orhan Pamuk, Sinan Yagmur, Mehmet Baransu, Mustafa Armagan, Serdar Ozkan, Ergun Poyraz, Mumin Sekman, Mustafa Balbay, Can Dundar, İpek Çalişlar, Nermin Bezmen, İlber Ortayli, Nedim Şener.