Diyarname
Di nîvfînala Lîga Şampiyonan de, du tîmên mezin, du tîmên navdar, têde bi heman mezinahî û navdarî lîstikvan û bi ser de jî du teknîk dîrektorên navdar hatin hemberî hev. "El Clasico", derbiya mezin ku îsal di lîgê de, di Kûpaya Kral a Spanyayê li dar ketibû; vê carê jî di Lîga Şampiyonanan de li dar ket.
Maça yekem a nîvfînala Lîga Şampiyonan a di navbera Real Madrid û Barselonayê de li mala Real Madrîdê, li Bernabeuyê li dar ket. Lê dema tîm Barselona be, lîstikvan jî Messi be ha mala Madrid Bernabeu, ha mala Barselona Nou Camp... Her der yek e.
Digel ku temaşevanên Real Madrîdê bi lazeran ronî dixistin ser çavên lîstikvanên Barselonayê, digel ku bi tezahuratên xwe dikirin tesîr jî li wan bikin lê li Bernabeuyê Barselonayê 2 gol avêtin Real Madrîdê û bi awantajeke mezin ji bo maça duyemîn vegeriya mala xwe.

Di nîveka yekemîn a maçê de tu hes û hewar ji golê nîn bû. Di nîveka duyemîn de lîstikvanê Real Madrîdê Pepe qersa sor girt û ji lîstikê hat avêtin, Real ma 10 kes.
Di deqîqeya 76'an de Afellay gogê ji Messi re avê, bêyî haya lîstikvanên defansê Realê jê hebe Messi ji navê wan re ket hundir û lêda: 0-1.
Ev têrê nekir. Di deqîqeya 87'an de vê carê Messi gog girt, defansa Realê yek bi yek derbas kir, wekî moriyên tizbiyan yek bi yek li dû xwe hişt û mohra xwe li maçê da: 0-2.

Maça duyem a nîvfînalê ya di navbe Barselona û Real Madrîdê de wê li Stada Barselona li Nou Campê di 3'yê gulanê de li dar bikeve. Bi vê skorê Barselona rehet e. Real Madrîd ji bo derkeve fînalê divê herî hendik 3 heb golan bavêje Barselonayê lê hinek zehmet dixuye.

Piştî maçê teknîk dîrektorê Barselonayê Josep Guardiola got ku her du tîm gelek caran hatin hemberî hev. Ji her demê zêdetir gere ew hay ji rewşê hebin û got ku ew hê derbasî fînalê nebûne.

Malpera UEFA'yê ji bo maçê sernavê "Guardola dilê Barselonayê geş kir" avê û di nûçeyên din de jî lîstikvan Messi wekî sihêrbaz binav kir. Her wiha malperê ragihand ku dê maça duyemîn ji bo Real Madrîdê zehmet derbas bibe.

Ji bo tekaşekirina golan: Real Madrid - Barselona: 0-2