Diyarname

Komeleya Alîkarî û Hevkariya Çandî ya Agirî bi navê “Cîhana Ramanî ya Ehmedê Xanî” konferansekê li dar dixe. Konferans dê ji hêla Midûrê Enstituya Zimanên Zindî û Cîgirê Rektorê Zanîngeha Artuklu ya Mêrdînê Prof. Dr. Kadrî Yildirim ve were pêşkêşkirin. Tê hêvîkirin dê Wezîrê Çand û Turîzmê Ertugrul Gunay jî beşdarî konferansê bibe. 

Komeleya Alîkarî û Hevkariya Çandî ya Agirî (AKYAD), bi navê “Projeya Fêmkirin û Jiyandina Ehmedê Xanî” li Agirî projeyekê dimeşîne. Komeleyê di çarçoveya projeyê de, bi navê “Cîhana Ramanî ya Ehmedê Xanî” pirtûkek daye amadekirin. Pirtûka ku ji hêla Prof. Dr. Kadrî Yildirim ve hatiye nivîsandin li dora sê hezarî hatiye çapkirin û dê li Agirî û navçeyên wê, bêpere li gel, nivîskar û kesên têkildar were belavkirin. Konferansa bi navê “Cîhana Ramanî ya Ehmedê Xanî” jî di çarçoveya projeya navborî de tê lidarxistin. Di konferansê de hem dê pirtûka navborî were danasandin, hem jî dê Prof. Yildirim bi heman navî axaftinekê bike. Konferans dê roja 2’yê Nîsanê, saet di 12:30’an de li bajarê Agirî, li Salona Konferansê ya Halk Eğitim Merkezî were lidarxistin. AKYAD heman konferansê, roja 3’yê Nîsanê jî li Patnosê li dar dixe. 

Rayedarên komeleyê li bendê ne ku digel Wezîrê Çand û Tûrîzmê Ertugrul Gunay gelek rayedarên din ên bajarê Agirî jî beşdarî konferansê bibin. Her wisa tê hêvîkirin ku dê hemû rektorên Zanîngehên li bajarên Kurdistanê, gelek lêkolîner û rewşenbîr jî tevlî konferansa navborî bibin. “Projeya Fêmkirin û Jiyandina Ehmedê Xanî” ku ji hêla AKYAD’ê ve tê birêvebirin, di warê aborî de ji hêla Wezareta Çand û Turîzmê û Fona Danasandinê ya Serwezaretiya Tirkiyeyê ve tê destekirin. 

Serokê AKYAD’ê Îzcî: Em dixwazin nifşên nû Ehmedê Xanî nas bikin

Serokê AKYAD’ê M. Mehmet Îzcî ji bo Diyarnameyê ragihand ku bi vê projeyê armanca wan a sereke ew e ku berhemên Ehmedê Xanî hemûyan ji nû ve çap bikin û di nav gel de belav bikin. Îzcî der barê projeyê de wiha axivî: “Wekî ku ji navê projeyê jî diyar dibe, armanca me ew e ku em Ehmedê Xanî, fikrên wî, mijarên ku di berhemên xwe de li ser xebitiye û peyamên wî yên manewî ku di nava rêzikên xwe de pêşkêş kiriye, bi awayekî ku were fêmkirin neqlî nifşên nû bikin. Her wisa, em ê hewl bidin ku hemû berhemên Ehmedê Xanî ji nû ve çap bikin. Digel vê, em ê der heqê jiyan û berhemên wî de konferansan li dar bixin û em ê hewl bidin ku wî bi her awayî bidin nasandin. Çimkî em di vê baweriyê de ne ku riya xilasiya mirovên li ser vê axê di fêmkirina cîhana ramanî ya zanayên wekî Ehmedê Xanî re derbas dibe.” 

Ji bo têkiliyê: 

Tel: (0472) 215 16 17

Mail: bilgi@akyad.org.tr 

***

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.