Diyarname
Fûara Pirtûkan a Çûkûrovayê bi dawî bû. Weşanên Ava ku beşdar bûbû ji bo wan fûar baş derbas bû.

4'emîn Fûara Pirtûkan a Çûkûrovayê îsal di navbera 11-16'ê vê mehê de li dar ket. Di 6 rojên fûarê de 170 weşanxane û saziyên sivîl stand vekirin, bi giştî 58 çalakiyên çandî li dar ketin û nivîskaran jî pirtûkên xwe îmze kirin. Li gor organîzatorên fûarê agahî dan me di van 6 rojan de bi giştî 190 hezar kes çûne serdana fûarê ku par ev hejmar 186 hezar bû.

Ji weşanxaneyên kurdan îsal tenê Weşanên Ava beşdar bû û li gor agahiyên ku me xwedî weşanxaneyê Ronî War girtin di sê rojên pêşî de fûar zêde ji bo wan baş nebûye, lê rojên din baş derbas bûye. War wisa got: "Sê rojên pêşî ne baş bû loma em tirsiyan lê sê rojên dawî de pir pir baş bû. Bi giştî fûar ji tiştên ku me hêvî dikir baştir derbas bû. Ê min bi xwe, min 161 pirtûkên xwe îmze kirin."