Cemil Oguz

Festîvala Helbestan a Navneteweyî ya Beyogluya Stenbolê îsal helbestvanên kurd dike mêvan. Di festîvalê de helbestvanên kurd Şêrko Bêkes, Arjen Arî û Jana Seyda dê derkevin pêşberî helbesthezan.

Festîvala Helbestan îsal 3'yemîn car ji aliyê Tarih ve Toplum Bilimleri Enstitusu (TTBE) û Şaredariya Beyogluye ve tê li dar xistin. Ji 24 welatan bi dehan helbestvan dê li Stenbolê derkevin pêşberî helbesthezan. Ji Tirkiyeyê digel kesên wekî Vedat Turkali, Cevat Çapan, Ahmet Oktay helbestvanên navdar ên wekî Kuçuk Îskender, Birhan Keskin, Orhan Alkaya jî dê li qadan helbestên xwe pêşkêş bikin.

Şêrko Bêkes tê

Ji Ermenistanê Ermenistan Henrik Edoyan, ji helbestvanên navdar ên kurdaŞêrko Bêkes, Arjen Arî, Jana Seyda dê bi helbestên xwe beşdarî festîvalê bibin, dengbêj Ekremo jî dê bi klamên kurdî rengê xwe li festîvalê bike.
Serokê Komîteya Festîvalê Salih Zeki Tombak li ser festîvalê agahî da me û got ku digel hatine helbestvanên kurd, ewê wergera pirtûka Şêrko Bêkes jî li vê derê çap bikin.

Ji Fransayê Prof.Dr. Philippe Tancelin, heta ji Îrlandayê Nuala Ni Dhomhnaill li gelek welatan helbestvan beşdarî festîvala helbestan dibin.
Bernameya Festîvala Helbestan, PEN Komeleya Nivîskarên Tirkiyeyê, Komeleya Wêjevanan, "Komeleya Huner û Wêjeyê ya Percereya Azad " a Edeneyê jî têde bi hevkariya gelek saziyên nivîskar û wêjevanan ve hatiye amade kirin. Festîval dê 22'yê vê mehê dest pê bike û 27'ê mehê bi dawî bibe.

Di festîvalê de ji bilî xwendina helbestan dê şano,  forum, konser, panel, gotûbêj û semîner jî li dar bikevin. Her wiha ji salên berê cihêtir îsal festîval dê bibe mêvanê dibistanan jî. Di 6 dibistanên lîseyê de wê helbestvan helbestên xwe pêşkêş bikin. Yek ji forumên ku dê li dar bikeve jî di roja yekemîn a festîvalê de bi rêveberiya Pelin Batu bi beşdariyeke mezin dê li dar bikeve.

Her wiha Kardeş Turkuler dê stranên xwe, bi mazûvaniya Şanogeha Muammer Karaca a Şaredariya Beyogluyê lîstika Genco Erkal û Şanoya Dostlar dê Însanlarim" a Nazim Hîkmet bê lîstin. Her wiya Şanoya Bajêr a Şaredariya Duzce jî dê "Sê helbestvanên xerîb" pêşkêş bike.

Di festîvalê de xelat jî têne dayîn. Xelata Sevda Ergin a Helbestê îsal di warê pirtûkê hatiye weşandin de didin Nur Saka, di warê dosyayê de jî didin Ozcan Ozturk. Her wiha juriyê di warê dosyaya ku nehatiye weşandin de jî Eylul Deniz layiqê "Xelata Taybet a Juriyê" dît.

Festîval di 22'yê mehê li Qesra Dolmabahçeyê li Salona Medhalê bi şevekê dest pê bike. Di şeva ku dê ji aliyê Yetkin Dikinciler û Yeşim Koçak ve bê bi rê ve birin de wê Aynur Doğan, Ozlem Taner, Murat Aydemir, Feryal Oney (Kardeş Turkuler), Anastasya Tanya Eden derkevin ser dikê. Festîval 27'ê mehê bi Seremoniya dawî  û xelatdayînê bi dawî bibe.