Stenbol
Seroka TUSÎAD'ê Umît Boyner got ku ji ber salên borî bûyerên ne baş derketine, îsal biryara ku wê li Taksîmê 1'ê Gulanê bê pîroz kirin erênî dît.

Seroka TUSÎAD'ê (Komeleya Karsaz û Sanayîkarên Tirkiyeyê) diyar kir ku ji bo pêşketina aştiya civakî biryara pîrozkirina 1'ê Gulanê ya li Taksîmê tiştek baş e.

Boyner li ser "Roja Ked û Piştgiriyê" 1'ê Gulanê peyameke weşand. Di peyama xwe de got ku di warê pêşketina civak û demokrasiyê de divê standardên baş ji bo xebatê bêne avakirin.

Umît Boyner diyar kir ku 1'ê Gulanê Roja Ked û Piştgiriyê, hem ji bo hurmeta bo kedê, hem jî ji bo pêşketina aborî û civakê xwedî kedeke pêşketinê ye.
Seroka TUSÎAD'ê bal kişand ser kuştinên di bûyera 1977'an de û diyar kir ku hê jî nedîtina kiryarên bûyerê ji bo demokrasiya tirk eybek e.

1'ê Gulanê li dinyayê wekî Roja Karkerên Cîhanê tê pîrozkirin. Li Tirkiyeyê van salên dawî de biryar hate girtin ku bi awayekî fermî wekî "Roja Ked û Piştgiriyê" bê pîrozkirin.
Ji sala 1977'an ve ku li Taksîmê bûyer derketin û bi dehan kesî jiyana xwe ji dest da ve li Taksîmê pîrozkirina 1'ê Gulanê hatibû qedexekirin. Ev çend salên dawîn sendîka dixwazin li Taksîmê rojê pîroz bikin lê her gav bi astengiyan hêzên ewlehiyê re rû bi rû dimînin. Îsal walîtiya Stenbolê destûr da sendîkayan ku pîrozbahî li Taksîmê pêk bê. Saziyên sivîl, partî, rêxistin û sendîka 1'ê Gulanê wê ji çar aliyan ve bikevin Taksîmê. BDP, KESK û hin rêxistin wê ji aliyê Şîşlî ve ber bi Taksîmê ve bimeşin û derkevin qada Taksîmê.