Cemil Oguz

Documentarist carek din hat ligel bi dehan belgefîlman. Yek jê jî "Kurdên Tokyoyê" ye.

Rojên Belgefîlman a Stenbolê bi kurtenavê xwe "Documentarist" îsal 11'emîn car dê li dar bikeve. Documentarist 9'ê mehê dest pê dike û heta 14'ê mehê dê bidome.

Documentarist ji aliyê komek hezkirên belgefîlman ve ev 11'emîn sal e tê li darxistin. Îsal jî ji gelek welatan û helbet ji Tirkiyeyê belgefîlmên cur bi cur têne pêşkêş kirin. Li dor 40 belgefîlm di bin beşên cuda de hefteyek li benda temaşevanan in. Li ser têkoşîna gelan, li ser mafên mirovan, li ser xwezayê, gelek belgefîlmên cur bi cur amade ne. Di nav van belgefîlman de gelek hene ku derdikevin pêş.

'Kurdên Tokyoyê'
Yek ji wan belgefîlmên ku derdikeve pêş jî belgefîlmê bi navê "Kurdên Tokyoyê" (derhêner Fumiari Hyuga) ye. Kurd û Tokyo? Çi eleqe? Kurd ku, Tokyo ku? Kurdên ku li gelek welatan hene li Tokyoyê jî hene. Belgefilmê navborî jî li ser van kurdan hatiye kişandin. Belgefîlmê ku îsal temam bûye û li Tirkiyeyê yekemîn car tê nîşandayîn. Lehengê belgefîlm Ozan dema 6 saliye ligel malbata xwe ji bo jiyaneke baştir ji Tirkiyeyê diçin Tokyayê. Ew niha êdî ciwan e lê ew kesek e ji derveyî civakê tê hiştin û xwe wekî kesek bêhêvî hîs dike. Ligel statuya "Biyanî" ew niha dike ku li nav sektora şahiyan şopek bihêle. Bi vî belgefîlmê 20 deqîqeyî parçeyek mirov ji kurdên Tokyayê hay jê dibe. (Rojên nîşandayînê: 10 pûşher, 14.00, AG - 12 pûşper, 15.00, KS)

Efsaneyê Yaşar Kemal
Yek ji belgefîlmên derhênerên kurd jî "Efsaneya Yaşar Kemal" e ku derhêner Aydin Orak kişandiye. Di fîlm de çîroka romanivîskarê navdar Yaşar Kemal tê ser ziman. Fîlmê 113 deqîqeyî berî vê di hin festîvalên din ên Tirkiyeyê de hatibû nişandayîn. (Roja nîşandayînê: 12 puşper, 19.00, MO)

Belgefîlmê Taylan Mintaş ê bi navê "Biratiya Bêdengiyê" ku li gelek festîvalan hat nîşandayîn û eleqe dît niha carek din vê carê bi rêya Documentarist derdikeve pêşberî temaşevanan.
Belgefîlmê "Ev/Mal" (Derhêner Felat Erkozan) ku li ser xaltiya Rana ku ev 20 sal in li Sûrê dijî û naxwaze mala xwe terk bike hatiye kişandin.
Belgefîlmê "Di bîra min de ye" (derhêner Soner Akalin) jî li ser diyaloga hevalên zarokatiyê  hatiye sazkirin. Yek ji wan çûye Fransayê bûye penaber ê din li vir bi telefonê pêre xeber dide û vê xeberdanê tomar dike.

Hurmet ji bo Sabike Kaya
Sabite Kaya derhênereke kurd bû. Piştî kişandina hin kurtefîlm û belgefîlman di sala 2014'an de ji bo Hevşaredariya Gimgimê hat hilbijartin lê ew jî wekî şaredarên din ên kurd bêsedem hat girtin û hê jî girtiye. Documentarist ji bo bibîranîna Sabite Kaya fîlmê wê "Bedensiz Ruhlar / Rihên Bêbeden" ku 59 deqîqeye nîşan dide.

Filistîn û 68
Di vê Documentaristê de du mijarên bingehîn hene yek jê Filistîn e ku 5 belgefîlmên li ser Filistînê têne nîşandayîn. Ya din jî 50 saliya serdema ciwanên 68'an e. Di vê çarçoveyê de jî 3 belgefîlmên welatên cur bi cur têne nîşandayîn. Di nav van de "Devrimci Gençlik Koprusu" (derhêner Bahriye Kabadayi) li ser ciwanên şoreş ên çepgir e ku ji Stenbolê diçin Zapê û li wir pir çêdikin.
Ya din li ser
Belgefîlmê "Haziran Kalkişmasi / June Turmoil / Serhildana Pûşperê" li ser çîroka xwendekarên ku di pûşpera 1968'an de li Belgradê rabûne ser piyan hatiye kişandin.
Belgefîlmê din ku di vê çarçoveye de dê bê nîşandayîn jî "In the Intense Now /Di nav xurtiya niha de" jî li ser salên 1966'an ên Çînê hatiye  kişandin.

Ev û gelek belgefîlmên din di çarçoveya Documentarist de li cihên wekî Aynali Geçit, Kadikoy Sinemasi, Yapi Kredi Kultur Sanat. Odeya Mîmaran, Navenda Çanda Fransiz bêne nîşandayîn.
Di çarçoveya Documentarist de ji bilî nîşandayîna belgefîlman xebatên atolyeyan, gotûbêj û nîqaş jî hene.

Ji bo agahiyên zêdetir:
www.documentarist.org