Diyarname
Tabloya wênesazê meksîkî Diego Rivera li Mezatxareya Christie ya li New Yorka DYA'yê (Dewletên Yekbûyî yên Amerîkayê) hat firotin. Tablo bi 9.76 mîlyon dolarî hat firotin. Ev buha reqema herî mezin e ku didin tabloyeke kesek ji Amerîkaya Latîn. Berî vê rekor di destê wênesaz Frida Kahlo de bû. Kahlo û Rivera bi hev re di nav têkiliya evînî, destgirtînî, bi gotineke din jin û mêrtiyê de bûn, lê têkililya wan di heman demê de bi pirsgirêk bû. Ligel her tiştî wan demek dirêj ligel hev derbas kir û her duyan jî wêne çêkirin. Wêneyê Kahlo "Li nav daristanê du tazî" di sala 2016'an de bi 8 mîlyon dolarî hatibû firotin û rekor di destê wê de bû. Niha Rivera ev rekor ji  wê girt.
Tabloya "Reqîbên hev" ya Rivera di mezatê de hat firotin lê kesê/a stand ne li salonê bû, bi telefonê beşdar bû, tablo kirî û nav nehat eşkerekirin kî standiye.
Di tabloyê de du meksîkiyên şewqeya gelîrî li ser wan û di şahiyek de ne dixuyin. Abby Rockefeller ku diya David Rockegeller e sîparîşa tabloyek wisa dabû Rivera û wî ev çêkiribû. Tablo di koleksiyona Rockefeller debû. Rockefeller di sala 1941'ê de ev tablo diyarî kurê xwe David û jina wî Peggy kiribû.