Diyarname

Îro li gelek bajaran gel hat ba hev û bi coş Newroz pîroz kir. Di Newroza Amedê de peyama gelê Efrînê jî hat xwendin.

AMED
Ji serê sibê de gelê Amedê ber bi qada Newrozê ve herikî. Hêzên ewlehiyê yên dewletê astengî derxistin, binçavkirin û girtin hebûn berî Newrozê û li qadê jî bi sedema 'li cem wan malbata wan nÎn e' kesên temen bin 18'e re nehiştin herin qadê. Her wiha polîsan pênûsên rojnamegeran jî kom kirin. Ligel her tişt gel li qadê bû. Diruşma "Bijî Berxwedana Efrîne" her bilind bû.

Hevserokê Merdînê Ahmet Turk (ê ku dewletê ji kar girt û kayûm şand cihê wî) axivî û got: "Em îro ji demek dîrokî re derbas dibin. Li ser gelê kurd polîtîkayeke qirêj dimeşînin. Dema em li paşerojê dinêrin ji em dibînin polîtîkayeke wisa hatibû meşandin. Li Agirî, Dêrsim, Helebçeyê gelê kurd hatibû qetilkirin. Lê van yekan qet nekarî kurdan ji têkoşîna azadiyê bi dûr bixe. Niha jî êrîşê Efrînê dikin. Yên bibêjin qey bi êrîşa Efrînê desthilatdariya xwe xurt bikin bila bizanibin ku ew dê bi temamî têk herin. Me Kemal Kurkut ê di Newroza Amedê de hat kuştin ji bîr nekir, ew şehîdê Newrozê ye. Têkoşîna azadiyê têkoşîneke demdirêj e. Ji ber vê yekê li ser vê rêyê bêyî em bi paş ve gav biavêjin emê bidomînin. Sedsala 21'ê dê bibe sedsala azadiya gelê kurd."

Peyama gelê Efrînê 

Di Newrozê de peyama gelê Efrînê jî hat xwendin. Hevserokê Kongreya Civaka Demokratîk (KCD) Berdan Ozturk ev peyam xwend. Vane hin notên ji peyama gelê Efrînê:

- Em wekî gelê berxwedêr ê Efrînê gelê Amedê yê berxwedêr silav dikin. Em gelê kurd, ereb û tirkmen ên li Efrînê dijîn, bi salan in di nava aramî, aştî û wekheviyê de dijîn. Lê em Newroza 2018'an di bin dagirkeriyê de derbas dikin. 

- Bila dost û dijminê me baş zanibin heta ku em axa xwe dîsa bi paş ve bistînin em dê têkoşîn û berxwedana xwe berdewa bikin. Artêşa dagirker yên ketin gundên Efrînê mal û milkê gel talan dikin û wêran dikin. Em dê heta dawî ji bo rûmet û axa xwe şer bikin. Em nasnameya xwe û azadiya xwe bi tu tuştî nadin guhertin. Bila fikara tu kesê tune be.  

- Efrîn êdî ne tenê mala me ye. Mala hemû gelan û mirovahiyê ye. Kesên ji hemû bajarên Kurdistanê hatin û ji bo axa Efrînê şehîd bûn dê qet neyên ji bîr kirin. Efrîn bajarê hemû mirovahiyê ye.

- Divê êdî Amed rola xwe ya dîrokî bilîze. Divê hemû kesên alîgirê mirovahiyê piştgiriyê bidin têkoşîna Efrînê. Ger ku em hemû bibin yek em dê karibin dagirkeran ji ser axa xwe paqij bikin. Amed paytext e. Divê êdî rola xwe ya pêşengiyê bilîze.

STENBOL

Li Stenbolê bi hezaran kes li Meydana Gel a Bakirkoyê hat ba hev. Ewlehiyeke mezin li Stenbolê jî hebû. Gel her diruşmên ji bo Efrînê bilind kirin.

Polîsan nehişt berstûka ku wêneyê Demîrtaş li ser bû bixin qadê. Dîsa parkarta "Em ne şer, aştiyê dixwazin", "Dê Dehaqên zalim winda bikin Kawayên Şoreşger bi ser bikevin" jî hatin destserkirin.

Peyama Selahattin Demîrtaş, Figen Yuksekdag, Leyla Guven, Mehmet Aslan, Sebahat Tuncel, İdris Baluken, Ayla Akat Ata ku li ser navê hemû girtiyan hatibû şandin hat xwendin. 

Piştî pîrozbaziyê hin kes hatin binçavkirin. Tê gotin ku li dor 70 kesî hatine binçavkirin.

WAN

Li Wanê gel li Parka Çandê ji bo Newrozê hat ba hev. Mebûsên HDP'ê Meral Daniş Beştaş û Îbrahîm Ayhan beşdarî pîrozbahiyê bûn. Her wiha şaredarên navçeyên Wanê yên ji kar hatine girtin jî li pîrozbahiyê amade bûn. Bi hezan kesî Newroz pîroz kir.

ENQERE

- Li Enqereyê polîsan nehiştin tiştên ji bo şewata Newrozê bixin nav qadê. Gel bi kincên xwe agirê Newrozê pêxist.