ÊLIH
Endama Jiyandina Hewildana Heskîfê Dîren Ozkan diyar kir ku ligel noqavkirina Heskîfê ne tenê dîrok di heman demê de pûnpiyên şaristaniyên li ser vê axê jî dê winda bibin. Ozkan xwest ku her kes ji bo parastina bajar xwedî dîroka 12 hezar salî bi hîstiyar tevbigere. Ozkan diyar kir ku qewlê welatên krediyê didin projeyê di 6'ê tîrmehê de bi dawî dibe û xwest ku bi tevahî piştgiriya xwe paşve bikişînin.

Hewldana Jiyandina Heskîfê ku di sala 2006'an de ji hêla sazî û dezgehên civakî, şaredarî û sendîqayan bi tevahî beşdariya 80 saziyan hate avakirin. Endama vê hewldanê Dîren Ozkan diyar kir ku di 6'ê tîrmehê de qewlê welatên krediyê didin Bendava Ilisûyê temam dibe.
Hewildan bi salan e ji bo parastina Heksîfê çalakiyên cur bi cur li dar dixe, xebatên der barê Heskîfê de jî dike. Hewildan ji bo gel li hemberî bendava 289 hoyûkan di bin avê de dihêle, 55 hezar kesî koçber dike, dibe sedema encamên civakî, aborî û psîkolojîk û xirabkirina ekosîstema Newala Dîcleyê xwedî agahî û hestiyar be xebatên xwe dimeşîne.
Ozkan li ser rewşa dawî ya Bendava Ilisûyê û Heskîfê agahî dan me. Dîren bang li hemû kesî kir ku li hemberî mijarê hîstiyar bin û hem bang li welatên krediyê dikin bikin ku piştgiriya xwe paşve bikişînin û hem jî li Tirkiyeyê hewildanên xwe zêde bikin.

'Xebatên me yên li dijî bendavê hatin îlegalîzekirin'

Ozkan diyar kir ku li gundên dê di bin avê de bimînin xebat meşandine û wiha axivî: "Me panel û mitîng li dar xistin. Me bi gundiyan û bi welatên dê krediyê bidin re hevdîtin pêk anîn. Me gelek dijwarî kişandin. Yên li hemberî çêkirina bendavê derdikevin wekî endamên rêxistina terorê nîşan didin û tên sûcdarkirin. Xwedî lêderketina dîrok, çand û xweza li Tirkiyeyê sûc e. Di dema lêkolînan de gelek caran em asteng kirin. Ketina me ya gundan hate astengkirin. Heskîf jêderka yekemîn a dîrokê ye. Heskîf cihek dîrok û xwezaya di nav hev de ya bêhempa ye. Wekî cihên din ên kevn ên cîhanê tenê bi avahiyan dernakeve pêş. 12 hezar sal in her tim bûye cihê jiyanê. Sedema vê yekê jî ew e ku heskêfî heta sala 1960'an di nav dîrokê de jiyane."

'Li Mezopotamyayê tekane cihê li ser piyan maye'

Li ser mijarê Ozkan diyar kir ku Heskîf li Mezopotamyayê tekane cihê bi dîroka xwe re li ser piyan maye û ev tişt got: "Heskîf muzeyek servekirî ye. Zêdeyî 20 şaristaniyên rojava û rojhilat li vir derbas bûne. Hurrî-mîtanî, Asur, Urartu, Med, Pers, Romayî, Bizansî, Emevî, Abbasî, Selçûkî, Artukî, Eyyubî û Osmanî li Heskîfê jiyan e. Her tim li vir şaristaniyên cuda û jiyanek zindî meşiya ye. Ji bilî Pira Heskîfê, Mizgefta El Rîzk, Tirba Zeynel Bey, nêzîk 6 hezar şikeft û bi taybetî keleha li ser. Heskîf nayê barkirin. Gotinên barkirina Heskîfê bê wate ne. Yên vê yekê dibêjin tiştek ji dîrokê, çandê û kevnareyan fam nakin. Bi hezaran salan gelê vir li Newala Dîcleyê bi avê ji xwe re jiyanek çandî çêkiriye. Ev çand tenê dikare li vir bijî. Li cihek din ne mimkûn e bijî. Ev di heman demê de hişmendiya mirovahiyê ye. Ji bilî vê 199 cihên jiyanê bandorê ji bendavê digirin. 55 hezar kes koçber dibin. Bi hezaran koçerên li vir bicihnebûne jî dê bandorê bibînin. Dê ekosîstema Newala Dîcleyê bê xirab kirin. Ji ber vê yekê em dest ji têkoşîna xwe bernadin."

Ozkan bang li hemû derdorên xweza û dîrokparêz kir û wiha domand: "Di 6'ê tîrmehê de qewlê welatên krediyê didin Tirkiyeyê bi dawî dibe. Heta vê demê çalakiyên me dê li Heskîfê çê bibin. Em dê ji welatên krediyê didin bi nameyan bixwazin piştgiriya xwe paşve bikişînin. Heta vê demê çalakiyên me dê bênavber bidomin. Piştgiriya me zêde dibe. Ji bo parastina dîroka 12 hezar salan lazim e herkes hîstiyar be."

Ji DÎHA'yê hatiye girtin