HENÎFE HISÊN

Bi navê xwe yê din Cebel Seyd, bi kurdî jê re dibêjin çiyayê Seydo. Ev dever cihekî çol bû, bi piranî kurdên Efrîn û Kobanî ji salên dirêj ji bo debara xwe bikin koçî bajarê Helebê kirin û bi kedeke pir mezin ew dever vegerandin taxeke ku lê jiyana xwe domandin. Paşê bû devereke ku bi hezaran malbatên kurd lê bi cih bûn û ji bo bajarê Helebê yê wekî bajarê duyemîn yê Sûriyê di hêla pîşesazî û aborî de tê naskirin. Gelê me yê cefakar li vî bajarî bûn beşeke mezin ji karkerên vî bajarî pîşesazî ya keda milê wan erzan. Lê tevî wê jî xwe bi jiyanê girtin û têkoşîna jiyanê dan. Bi karekterê xwe wekî çîna karker, heya dawiyê fedekar û welatparêz in. 

Bi têkoşîna Azadiya Kurdistanê re ev gelê me yê fedekar deriyê xwe ji tevgerê vekir û bi hemû hêza xwe di nav de cih girtin. Bi sedan zarokên vî gelî di nava têkoşîna azadiyê de cih girtin û şehîd ketin. Di vê wateyê de xwedî mîraseke têkoşînê ya mezin in. Di pêvajoya şoreşa Rojava û Sûriyê de bê dudilî beşdarî nava refên şoreşê bûn. Ji ber gelekî zana û bi rêxistinkirî ye. Hîn ji destpêka şoreşê xwestin bi rêya Eşîra Begaran xwestin provokasyonekê çêkin û şerê kurd û ereban derxînin. Di vî şerî de heval û dayîka me Gulê Selmo jiyana xwe ji dest da. Lê bi sekna xwe ya politîk û rêxistinkirî ev komplo vala derxistin û dev ji cih û warê xwe bernedan. Paşê grûbên qaşo Artêşa Azad xwestin xwe di taxê de bi cih bikin. 

Bi rastî hîn ji destpêkê ve gelê me li vê herêmê zorî û zehmetiyên mezin kişandin, ji ber jiyana wan mîna ku di devê gur de be dijiyan. Ger xwe nêzî Artêşa Azad dikirin rejîmê li wan dida û dema dixwestin xwe ji lêdana rejîmê biparêzin jî wan komên çekdar êrîş dikirin. Di nava vê dualîtiyê de jiyan ew qasî ne hêsan bû. Ji bo wê bi dehan caran şer derketin û di van şeran de bi sedan gelê me yê sivîl jiyana xwe ji dest dan. 

Di şerê li Eşrefiyê de, lêdana balafirên rejîmê li taxa Marûf û şerên din ên ku qewimîn de hem grûbên çete û hem jî rejîmê li ser gelê me komkujî pêkanîn. Lê car din gelê me bi derfetên xwe yên kêm û bi ewladên xwe yekîneyên xwe ên parastinê çêkirin û li hemberî her êrîşê li ber xwe dan. Digotin heya zarokên me li vir in, em jî vê derê bernadin. Ji bo wê li her derê şer bisekine peyman çêbibin jî li vê devera biçûk tu carî şer û pevçûn nasekine. Ji ber deverek stratejîk e û hemû Helebê dixe bin kontrola xwe. Niha ew taxa biçûk bûye xwedî wateyek pir mezin. 

Ev çend sal in di bin dorpêçê de ye û ji 4 mehan zêdetir e ev tax di bin êrîşek mezin de ye. Li vê deverê hemû bêrêtî û kirêtî tên meşandin. Heta çekên kîmyewî hatin bikaranîn, bi hezaran fuze û topên dojehê tên bikaranînin. Şeva din dîsa komkujiyek pêkanîn û di encamê de dayika Şehîd Rizgar û gelek welatiyan jiyana xwe ji dest dan, lê mixabin cîhanê tevî xwe kerr kiriye û bêdeng in. Ji vê bêdengiya wan jî diyar e ku hemû hêzên cîhanî hevkarê vî şerê bi qirêj in. Di serî de DYA, neteweyên yekbûyî û hemû hêzên koalîsyona navdewletî berpirsyarê vî şerî ne. Nêzîkatiyek heya dawiyê cotstandart heye. 

Ji milekî ve bi me re mil bi mil li Cizîrê li hemberî komên çete şer dikin, ji milê din grûbên girêdayî koalisyonê êrîşî gundewarên Efrîn û taxa Şêxmeqsûd dikin. Her roj sozên ku em li ser disekinin û em ê agirbestê çêkin didin, lê di pratîkê de tiştekî bi vî rengî li holê nîn e. Dema hêzên me dixwazin ji Kobanî û Efrîn ber bi Şêxmeqsûd û herêma Şehba ve biçin jî nerazîbûna xwe diyar dikin. Ji ber ku bi vê rengî Tirkiyê di xeta xwe de digrin. Armanca wan zelal e, naxwazin em ber bi wê qadê ve biçin ku navbera kantonan vebe û pergala federal li wan deveran pêk were. Ji milê din ve jî li Tirkiyê civînan çêdikin û grûbên wekî Ceyş el Şîmal ava dikin. Ev karakterê Amerîka ye, xwe bê alternatîf nahêlin, hem bi me re li dijî DAÎŞ’ê şer dikin, hem bi grûbên girêdayî xwe li dijî gelê me şer dikin. Ev jî di bin navê ku Tirkiyê wê bixeyide û nerazî ye dikin. 

Jixwe diyar e hêzên modernîteya kapîtalîst pragmatîst e û li gorî berjewendiyên xwe nêz dibe. Wê wextê berjewendiyên gelê me jî hene û bi taybet Şêxmeqsûd ji bo me xeta sor e. Em ê çavên xwe ji van komkujiyan re negirin. Bedela wê çi dibe bila bibe em ê ji bo parastina gelê xwe têkoşîn û berxwedana xwe berdewam bikin. Bila gelê me ji bilî hêza xwe ya cewherî baweriya xwe bi tu hêzên din neyne. Dostên kurdan nîn in, lê kurd ne bê alternatîf in jî. Wê gelê me heya dawiyê xwe biparêze û li hemberî hemû konseptan jî vê sekna xwe ya bi rûmet berdewam bike. Serkeftin ya gelê me ye.

jindasilan@gmail.com

20.06.2016, Yenî Ozgur Polîtîka