Amed

Hemşaredara Bajarê Gird a Amedî Gultan Kişanak, îdiayê rojnameyê Starî bi ziwanêko tuj zûr vetî û va, “Na 77 rojîyo ke tu kes nêşîyo mîyanê Sûrî, îdîa kenê ke, qaşo ez şîya uca, mi tehtîd kerdê, dest nîyayo mi ser. Nê îdîayî pêro zûr ê û aqilî ra zûr ê..”

Rojnameyê Starî ewro xeberêka xo de anca Hemşaradara ma Kişanak hedef nîşan da û va “PKK mîyanê Sûrî de binê bodrumêk de dest naya Kişanak ser. PKK eyar da Kişanake û aye tehtîd kerda”. Hemşaredara Bajarê Gird a Amedî Gultan Kişanake derheqê xebera rojnameyê Starî de beyanatêko nuştekî da.

Hemşaredara Bajarê Gird a Amedî Gultan Kişanak, îdiayê rojnameyê Starî bi ziwanêko tuj zûr vetî û wina va: “Sûr de qedexeyê  tebervejyayîşê kuçeyan dewam keno,uca de pêrodayîş esto û kesêk nêeşkeno bikewo uca. Ez qet nêşîya Mîyanê Sûrî û mimkûn nîyo ke ez şêra uca. Ne tu kes dest nayo mi ser û mi tehtîd kerdo. Na 77 rojîyo ke tu kes nêşîyo mîyanê Sûrî, îdîa kenê ke, qaşo ez şîya uca, mi tehtîd kerdê, dest nîyayo mi ser. Nê îdîayî pêro zûr ê û aqilî ra zûr ê.”

Nê xeberî semedê zemînê mudaxeleyî yenê hadrekerdiş …

Kişanake îzeh kerd ke bi rojano medyaya ke nêzdîyê hukmatî ya de, derheqê aye û Şaredarîya Bajarê Gird a Amedî de xeberî yenê viraştiş û wina va, “Nê xeberî exlaqê rojnamegerîye ra dûr ê. Bi nê bêbextiyan wazenê şaredarîye bêîtibar bikerê.  Nê xeberî semedê zemînê mudaxeleyî yenê hadrekerdiş. Çîyo ke rojnemegerî nîya û bêexlaqî yo.”

No zihniyet homayî ra nêterseno û şerm nêkeno…

Kişanake da zanayîş ke nika zihniyetêko winasî esto, “No zihniyet homayî ra nêterseno û şerm nêkeno. Vanê ‘Ma senî bike ke heme dezgeyanê Dewlete bigîre xo dest.’  Bêbextî kenê û îftîrayankenê. bê pers û persyar înfaz kenê.”

Wa tu kes bi zûran xo nêxapîno

Kişanake ard vîr ke bi a serrano ke bi sloganê “raştî tarîyîye de nêmano” rojnamegerî kerda û wina qisey kerd: “Heme raştîyê  serranê 90’an vejîyayê orte. Wa tu kes bi zûran xo nêxapîno. Raştêyê nê rojan zî do demêko kilm de vejîyê meydan.”