Diyarname

Di danişîna îro ya meclisê de Mebûna HDP'ê ya Stenbolê Filiz Kerestecioglu got li Cizîrê koma ku xwest here birîndaran bigire bi ser wan de gule hatine reşandin û birîndar hene. Cîgira Serokê Meclisê Pervîn Buldan ku îro dora birêvebirinê ya wê bû li ser gotinên Kesertecioglu ji bo yek ji rayedarên hikumetê were agahî bide meclisê saetek navber da danişînê. Li ser vê yekê mebûsên AKP'ê bertek nîşanî Buldan dan û di navbera AKP û HDP'yiyan de pevçûn derket.

Buldan wisa got: "Gavek berê birêz Faysal Sariyildiz bi telefonê xwe gihand min. Li cizîrê rewş gelek xeter e, bi ser kesên sivîl de, di heman demê de bi ser mebûsan de gule reşandine. Di nav van de mebûsê me yê Şirnexê Faysal Sariyildiz jî heye. Gavek berê wekîlên Serokê Koma me jî diyar kirin rewş krîtîk e û ev yek nayê qebûlkirin. Lewre li ser daxwazê jî ji bo yek ji rayedarên ji hikumetê bê agahî bide ez saetek navberê didim danişîna meclisê."

Mebûsên HDP'ê ji bo vê biryarê li çepikan dan, hlê mebûsên AKP'ê bi ser HDP'yiyan de meşiyan û êrîşê wan kirin. Mebûsên CHP'ê ketin navberê û rewş asan bû.

Kameramanê ÎMC TV birîndar bû

Îro li Cizîrê serê sibê komek kesên sivîl ji bo cenaze û birîndaran bigirin çûn Taxa Cûdiyê; ji taxê cenazeyên Serhat Altun, Ahmet Tunç û Mehmet Kalan û 4 birîndar girtin û hatin ser Kolana Nisêbînê. 

Dema ku girse hate ser Kolana Nisêbînê ji wesayîtên zirxî yên hêzên dewleta Tirkiyeyê gule bi ser wan de hat barîn. Di vê gulebaranê de 10 kes birîndar bûn ku di nav birîndaran de kameramanê ÎMC TV Refîk Tekîn jî heye.

HDP bi Cîgirê Wezîrê Karên Hundir re axivî

Ji bo li ser bûyerê bê sekinîn, birîndaran rakin nexweşxaneyê û Sariyildiz jî di nav de sivîl ji wir derkevin mebûsên HDP'ê çûn serdana Wezareta Karên Hundir. Koma HDP'ê ligel Cîgirê Wezîrê Karên Hundir Sebahattin Ozturk re hevdîtin pêk anîn û Ozturk soz da ku di nav saetek de birîndaran rakin nexweşxaneyê û komê ji wir derxin. Piştî vê hevdîtinê Mebûsê HDP'ê Faysal Sariyildiz, Hevşaredarê Cizîrê Kadir Konuk û sivîlên bi wan re ji wir derxistin, birîndar jî rakirin nexweşxaneyê.

Heyeta HDP'ê diyar kir ku ew bûyerê ji nêz ve dişopînin.

Demîrtaş: Bila her kes xwedî li Cizîrê derkeve