Diyarname

Saziya Îstatîstîkan a Tirkiyeyê (TUÎK)  îstatîstîkên li ser sînema û şanoyê yên sala 2014'an weşandin.

Li gor TUÎK'ê par li Tirkiyeyê sedî 22.9 temaşevanên sînemayê zêde bûne û hejmar gihîştiye 55 mîlyon û 378 hezar û 716 kesî. Dîsa li gor 2013'yan hejmara kesên çûne li fîlmên ji Tirkiyeyê temaşe kirine jî hejmara wan bi sedî 24.2 zêde bûne û bi giştî 30 mîlyon û 994 hezar û 840 kesî li fîlmên Tirkiyeyê temaşe kirine. Ewên çûne li fîlmên biyanî temaşe kirine jî bi sedî 21,2 hejmara wan zêde bûye û gihîştiye 24 mîlyon û 383 hezar û 876 kesî.

Di pênc salên dawî de hejmara salonên sînemayê sedî 18.3 zêde bûye, hejmara rûniştekên li salonan jî sedî 10.8 zêde bûye.

Di beşa şanoyê de paşketinek çêbûye. Par (serdema 2013-2014 a şanoyê) li gor serdema şanoyê ya sala 2012-2013'yan sedî 9,9 salonên şanoyê kêm bûne, lê rûniştekên li salonan sedî 5 zêde bûne.

Di danberheva heman serdeman de sedî 6,8 lîstik zêde bûne. Di heman serdemê de sedî 2.7 hejmara temaşevanên şanoyê kêm bûye. Bi giştî 6 mîlyon û 76 hezar û 128 kes çûne temaşekirina lîstikan.