Diyarname

Hevserokê HDP'ê Selahattin Demirtaş îro li Sancaktepeya Stenbolê bû. Demîrtaşî mîzginiya ji bo sibê da û got "Emê herin cem sindoqê. Emê xwedî li vîn û dengên xwe derên. Çend saet mane em ji vê belayê rizgar bibin."

Duh di mîtînga HDP'ê ya Amedê de kes an kesên nasname nediyar bombe xistibûn tûpê û ew teqandin. Di bûyerê de 4 kesî jiyana xwe ji dest da, li dor 400 kesî birîndar hene. Û îro tu rojnameyek nêzî hikumeta AKP'ê ev bûyer negirt rûpela xwe ya yekemîn. Hevserokê HDP'ê Demîrtaş li Sancaktepeyê ev rojname yek bi yek vekirin, ew rexne kir û got: "Ev rojnameyên îro ne, ha vane weşanên AKP'ê. Bila Tirkiye di weşana zindî de lê temaşe bike. Ka binêrin çi manşet (sernav) nivîsîne. Duh komkujî çêbûye. Rojnameya Starê manşeta 'Îtîfaqa Xaçperest' bikar aniye. Hê me hedef nîşan didin. Ev rojname hemû ev du meh in me wekî hedef nîşan didin û lînç dikin. Fermo rojnameyên AKP'ê. Guneşê wisa nivîsiye 'Tirkiyeya nû û xaçparêz'. Binêrin qirêjiyek din, rojnameya Sabahê. Tenê rêzek cih nedaye komkujiyê û me hedef nîşan dide. Ji bo ku AKP bi ser bikeve û HDP di bin bendavê de bimîne me ji bo hemû gur û çeqelan wekî hedef nîşan dide. Li qada Amedê bi bombeyan xwestine me bikujin, lê ka li manşeta van binêre. Serokomar ji dêvla li min digere bila li van rojnameyên xwe bigere."

Demîrtaş rexne li Serokomarê Tirkiyeyê Erdogan jî kir û got: "Piştî êrîşa bombeyî ya li Amedê Serokomar Erdogan sê saetan di weşana zindî de axivî, dibêje ez bêalî me, ez serokomarê 77 mîlyonî me. Li ser qada Amedê, li ser wehşeta wê derê, li ser vê hovîtiyê peyvekê jî nabêje. Kiriye ku êvarê xwe bigihîne min. Qisûrê nenêre. Ev du meh in qad bi qad tuyê negeriya û teyê heqarek li me nekira. Îro ji dêvla tu mîtîngê çêbikî, ji dêvla ji bo AKP'ê dengan bixwazî tu biçûya qada li Amedê û te gulek daniya cihê bûyerê, te êşa gel parve bikira. Ez bersiva telefona te bidim dê çi be, nedim dê çi be? Te ya xwe jixwe kiriye. Di du mehan de bi sedan caran êrîşê me kirine. Li her derê bi çekan, bi bombeyan bi ser me de hatine. Tenê kesek jî negirtine bin çavan."

Demîrtaş bang kir ku li cem sindoqan xirecirek biçûk jî dernekeve, armanca wan bikaranîna dengan e û xwest her kes bi sebir tevbigere.