Amed
Lijneya Rêveberiyê ya Baroya Amedê ji bo di bin banê wê de 'Enstîtuya Kurdolojiyê' bê vekirin serî li Zanîngeha Dîcleyê da.
Lijneya Rêveberiyê ya Baroya Amedê ji bo ku di bin banê Zanîngeha Dîcleyê de Enstîtuya Kurdolojiyê û di bin banê Zimanên Rojhilata û a Fakulteya Fen-edebiyatê de beşa 'Zimanê Kurdî û Beşa Wêjeya Zanistî" bê vekirin serî li rêveberiya Zanîngeha Dîcleyê da.
Serokê Baroya Amedê parêzer Sezgin Tanrikulu li ser meseleyê li Navenda Perwerdehiya Baroyê civîneke çapemeniyê li dar xist û xwest digel Zanîngeha Dîcleyê, li zanîngehên Stenbol û Enqereyê jî beşên kurdolojiyê bêne vekirin.
Tanrikulu da zanîn ku ji bo di bin banê Zanîngeha Dîcleyê de beşên Enstîtuya Kurdolojiyê û Beşa Ziman û Wêjeya kurdî vebe wan serî li Rektoriya zanîngehê daye.
Parêzer Tanrikulu da zanîn ku li zanîngehê Tirkiyeyê ji welatên Rojhilata Dûr û welatên rojavayê gelek beşên ziman hene û wiha berdewam kir: "Bêşik enstîtuya kurdolojiyê, beşa ziman an kursiya li ser ziman dewlemendiyek e, hem î li gor hiqûqa mirovî ya navneteweyî, li gor hiqûqa navdewletî jî tiştekî divê ye û baş e."
Prz. Sezgin Tanrikulu da zanîn ku li ser daxwaza xwe wan mînaka Iraqê nîşan daye û ev tişt lê zêde kir: "Ev rewşa baş ku ji bo zimanên din ketiye jiyanê divê ji bo Enstîtuya Kurdolojî û Ziman û Wêjeya kurdî jî bê nîşandan. Li gelek welatên li derveyî Tirkiyeyê ku kurd lê dijîn saziyên bi vî rengî hene. Li Dewleta Iraqa Federal de ji bo kurdan ji vê bilindtir di astê de rewş heye. Li Tirkiyeyeke demokratîk saziyên bi vî rengî dê kedê bixin nava aştiya navxweşî."
Foto: DÎHA