Diyarname

Tirkiyeyê heta niha cih dabû kanala ‘Mekameleen’ a Birayên Misliman (Îxvan) lê niha kanalê ragihand ku ew studyoyên xwe yên li Tirkiyeyê bar dikin cihek din.

Biryar bi çûyîna Serokomarê Tirkiyeyê û Serokê AKP’ê Recep Tayyîp Erdogan a ji bo Erebistana Siûdî re hat. Kanalê daxuyaniyeke nivîskî belav kiriye û gotiye, “ji ber rewşa heyî ku ji kesî nayê veşartin em studyoyên xwe yên li Tirkiyeyê vala dikin. Lê emê li paytextên cuda yên li dinyayê studyoyên nû vekin.”

Di serî de Misir, Erebistana Siûdî, Mîrektiya Eberan a Yekbûyî gelek welatên Kendavê ji xebatên Birayên Misliman ên li Tirkiyeyê aciz in û gelek caran ev aciziya xwe anîne ziman.

Di salên dawî Tirkiyeyê ji bo gelek çapameniya muxalif a welatên ereb ên wekî Misir, Sûriye, Yemen û Lîbyayê mazûvanî kiribû.

Li aliyê din ji bilî “Mekameleen”, ofîsên kanalên wekî “El-Sharq”, “Vatan” ên têkiliya wan bi Îxwanê re hene jî li Tirkiyeyê hene.

Par AFP’ê ragihandibû ku rayedarekî Tirkiyeyê ji van saziyên çapemeniyê yên muxalif re gotiye ku zimanê xwe yê li hemberî Sisi nerm bikin. Wezîrê Karên Derve yê Tirkiyeyê Mevlut Çavuşoglu roja 12’yê adara 2022’yan de gotibû ku ligel Misrê têkiliyên dîplomatîk ên pêşî hatine sazkirin. Lê Misrê gotibû ji bo nermbûna rewşê ew li bendê ne ku Enqere gavên zêdetir biavêje.

Mekameleen TV di sala 2015'an de hatibû avakirin. Kanal bi ser peyka Es’hail 2 ku xwediyê wê Katare re bi erebî weşana xwe dike. Navenda wê li Tirkiyeyê, li Stenbolê bû.