DiyarName.Com

XELAT Û KRÎTER

Dîrok: 21/01/2014

Di gulana 2013’yan de Kurdî-Dera Îzmîrê û Weşanên Na ji bo Roja Ziman çalakî lidarxistibûn. Di çalakiyê de xortekî li erbanê dida. Dengbêj Nîhat li wir amade bû, cara pêşî bû ku min ew dinasî. Kalê Qurdisî, Receb Dildar û ez, em ji bo helbestxwendinê li wir bûn.

Çalakiyê bi dorvegerî dewam dikir. Dora helbestxwendinê dora min bû. Min helbest xwend. Li dû min wê Dengbêj dîsa kilamekê bigota. Mîkrofon di dest wî de bû, li min nihêrî, got:

“Gelo Cîhan Roj dikare helbesteke din ji me re bixwîne.”

A ku baş tê bîra min ev e ku beden li min sivik bûbû, halê dilê min dişibiya halê zarokatiya xwe; xelata herî delal bû di wê kêliyê de ji bo min. Dengbêj dora xwe dabû min! Ji bo helbestê helbet ev dihat mehneyekê; ji alî deng û sewtê ve belkî ji ber sedemên din min hukum li dengbêj kiribû!

Di zarokatiya xwe de, di bereqeyan de cî nedima, di çilê zivistanê de, em li ber şibakeyan, dibûn guhdarên dengbêjan -Dengbêjî li her devera Kurdistanê bi qedir be jî, ji alî sewtê ve li Serhedê wateyeke xwe ya din heye-

Bîst sal bi ser helbestvanî, nivîskariya min ketibû ku yek ji kêliya herî xweş bû ji bo min; xelateke delal li ber dilê min bû.

Hin Nivîsen Nivîskar

Mayîndeyên çand û wêjeyê; bîranîn û rojenivîsk

25 Avrêl 2015

Nivîsa min ya li jêr beriya sêzdeh salan "Kovara Nivîs" (Kovareke înternetî bû), Hejmar 15 - 21.04.2002) hatibû weşandin. Dixwazim careke din beşekê jê parve...

ŞIVERIYÊN RÊYA ELIMÎNAN

16 Avrêl 2012

Li Îzmîrê H.Kovan, Meniko, Şems û Berfo her roja şemiyê tên ba hev, wekî sohbetên kafeyê, di derbarê babeteke edebî de digengêşin. Di du sohbetan de ez...

EV ‘30 KITÊB’ LI KU NE?

11 Tebax 2012

Di nivîseke xwe de, min helbesta Boraboz wekî metna nivîskî ya pêşî derbiribû. Gelo wisa ye? Bi îhtimalek mezin na! Valahî, bêderfetî û...

Cîhan ROJ kî ye?

Cîhan Roj, di sala 1965'an de, (di qeyda fermî de 1964) li gundê Înaqa Gimgimê ji dayik bûye. Dibistana seretayî li gund, ya navîn û lîse li Gimgimê xwendiye. Despêka bi kurmancînivîsana wî 1993 ye. Di heman salê de helbest û çîrokên wî têne weşandin. Di salên du hezarî de ew hinek termên matematîgê diafirîne û ji Enstituyê re bi rê dike. Ew xebat di sala 2006'an de di Azadiya Welat de tê weşandin. Nivîskar ji sala 1993'yan heya sala 1997 an li Mêrdînê, li sendîkaya kedkarên qada perwerdehiyê, wekî sekreterê perwerdehiyê rêveberî dike. Di sala 2001'ê de, bi pêşniyara wî, li Îzmîrê, ‘Konferansa Nivîskaran’ tê lidarxisitin. Li dû konferansê, ew qerar digire û bi tenê bi edebiyatê re mijûl dibe. Dîwana wî ya ewil “Ratîka” di sala 2002'yan de çap bûye. Di gelek malper, rojname û kovaran de, nivîsên wî hatine weşandin. Romana wî “Perde” bi navê “Mahrum” bi tirkî derketiye. Bi tevî pirtûkek di derheqê Cîgerxwîn de hatiye weşandin, di pirtûka bi navê “Kawayê Min” de û di pirtûka kurteçîrokan a ji hêla Şaredariya Amedê ve hatiye çapkirin de ew jî yek ji nivîskaran bû.

Heya niha gelek pirtûkên wî ên helbestê, çîrok û romanên wî hatine weşandin. Dosya helbestan a nû "Asê", romana wî a nû “7 AV 7 Agir 7 Derî” bi tevî hemî berhemên wî wê heya payîza 2023'yan ji nav weşanên Peywendê werin weşandin.

Cîhan Roj hê jî bi romanûsiyê re mijûl e.