Diyarname

Li Tirkiyeyê serdema nû ya perwerdehiyê dest pê dike. Kurd li aliyekê ve dibistanên xwe vedikin, li aliyê din dest bi boykotê dikin. Vane hin notên dawî yên li ser meseleyê:

Boykota Egîtîm-Senê

- Serdema perwerdehiyê ya sala 2014-2015'an a perwerdehiyê li Tirkiyeyê roja 15'ê mehê dest pê dike. Li Amedê Egîtîm-Sena Amedê bang li gel kir ku dibistanan boykot bike û xwedî li dibistanên kurdî derkeve.

Di daxuyaniyê de xwestin ku perwerdehî û hîndekariya kurdî bigirin bin ewlehiya Zagona Bingehîn. Her wiha Egîtîm-Senê ji Wezareta Perwerdehiya Neteweyî ya Tirkiyeyê xwest ku wezaret li dibistanên kurdî pêşî li perwerdehiya kurdî veke û li gor vê yekê pergalê saz bike.

Dibistana li Kerwasê

Li gundê Kerwasa Licê ya Amedê gel bêyî piştgirî ji dewletê bigire dibistaneke ava kir. Îro komek leşker ji bo dîtina rewşê çû gund. Li aleyê din hat gotin ku leşker ji bo xirakirina dibistanê çûye gund. Lê gundiyan rê li ber leşkeran girt û nehiştin nêzî dibistanê bibin. Heta ber êvarkî rewş wisa dom kir û leşker paşê bi paş ve vekişiyan. Sibê dê rewş çawa be nediyar e.

Li Amedê endamên Egîtîm-Senê ji bo piştgiriya Kerwasê li bexçeyê Midûriyeta Perwerdehiyî ya Amedê çalakiya rûniştinê da dest pê kirin.

Li gor agahiyan îsal li vê dibistanê dê perwerdehiya bi kurdî bê dayîn.

Şaredarî dest bi amadehiyan dikin

Li gor agahiyên nû li Kayapinara Amedê, li Cizîra Şirnexê û li hin derên din şaredarî amadehî dikin ku dibistanên kurdî vekin. Şaredarî bi helwesta "ne li benda dewletê bin, hûn bi xew bikin" dikeve rê.*

Tenê 17 mamosteyên ji bo kurdî!

Li Tirkiyeyê di dibistanên  tirkî de kurdî wekî derseke hilbijêr e û li gelek dibistanan jî bi îdîaya "eleqe nîn e" ew ders jî nayê dayîn. Di dawiyê de nav lê heye. Wezareta Perwerdehiya Neteweyî ya Tirkiyeyê îsal 40 hezar mamosteyên ji bo zimanê tirkî wekî kadro girtin kar lê di nav van de tenê 17 mamoste ji bo kurdî girtin.

*Li ser xebatên şaredariyan ên di vî warî de emê agahiyên berfireh biweşînin