AMED 

Komekî ajokarên minîbûsan ji ber ku Şaredariya Bajarê Mezin a Amedê du otobus li ser riya Farqîn û Amedê dan xebatê, hatin ber şaredariyê û êrîşê şaredariyê û xebatkarên wê kirin.

Şaredariya Bajarê Mezin a Amedê 2 otobûs ku dê rêwiyan bibin Farqînê û bînin Amedê dan xebatê. Bi vê yekê kir ku buhaya birin û anîna rêwiyan hinek din erzantir jî bû. Li ser vê yekê hinek ajokarên minîbûsan bi hinceta zirarê dikin êrîşê şaredariyê kirin. Gelek kesên ji Farqînê bi wesayîtan hatin bi daran xwestin bikevin şaredariyê. Komê bi daran êrîş li peywirdarên ewlekariyê ku destûr nedan wan ku bikevin şaredariyê kir. Peywirdarên ewlekariyê ku derb xwarin, gule bera hewa dan û komê pişt re derî û paçeyên şaredariyê şikandin. Di encama êrîşê de 3 xebatkarên ewlekariyê birîndar bûn û ew rakirin nexweşxaneyê.

Piştî êrîşê gelek polîs hatin cihê bûyerê, pêşî polîsan tiştek negot, ew êrîşkar belav nekirin, piştî xebatkarên şaredariyê bersiva êrîşkaran da, polîsan bi bombeyên gazê û ava şid mudaxele kir. Welatiyên êrîş bihîstin jî hatin ber avahiya şaredariyê. Welatiyan bertek nîşanî koma êrîşkar da û polîsan bi bombeyên gazê û guleyên plastîk êrîş li gel jî kir. Di encama êrîşê de gelek welatî birîndar bûn. Di heman demê de polîsan êrîş li xebatkarên çapemeniyê jî kir.

Li ber şaredarî xirecir didome.